شه‌هيده‌يل ياسا

شه‌هيده‌يل ياسا
2017-11-28T17:13:00+00:00

شه‌فه‌ق نيوز/ هه‌رچه‌نى سياسه‌ت له‌ حاڵه‌ته‌يل جه‌نگ داوه‌زيه‌، وه‌لێ هيمان كووتايى وه‌پى ناتگه‌، يه‌يش نيشانه‌ى ئه‌وه‌سه‌ ك سياسه‌ت وجوود له‌گشت شوونيگ ديرێد و سياسيه‌يل له‌وه‌خت تارمايى جه‌نگ و له‌ رووشنتيى ئاشتييش هوير له‌ ده‌سڵات ئه‌كه‌ن.

 

جى داخه‌ له‌ ماوه‌ى 14 ساڵ گوزه‌يشت شماره‌ى چالاكوانه‌يل كيشه‌گه‌مان ك گيان له‌ده‌سدان فيشتر بوى له‌ شماره‌ى ئه‌وانه‌گ خوه‌يان به‌خش كردن ئه‌را رزه‌يل خه‌بات وه‌خاتر مافه‌يل بنه‌ڕه‌تى ئاده‌ميزاد فه‌يلى! وه‌لێ نه‌بايه‌د بڕيگ نه‌ياره‌يل راسكانى گشت ئه‌و ده‌سكه‌فته‌يله‌ ك وه‌ده‌س هاتنه‌و ئه‌وه‌گ وه‌ده‌س ئه‌ياد وه‌ "نه‌خێر" بخه‌نه‌ سه‌ندووق مه‌زه‌نه‌و ده‌نگداين! ئاشكرايشه‌ ك گشت چشتيگ وه‌گووره‌ى ريكخستن خواست نايه‌ێد، وه‌ل ئه‌وه‌يشا نه‌بايه‌د جيايى له‌ ناونى ئنسانيه‌ت كورده‌يل فه‌يلى و مه‌زڵوميه‌تيان بكريه‌ێد.

 

ئه‌وانه‌ لايه‌نه‌يليگ سياسيمانن ك به‌رنامه‌ نه‌يرن و چالاكوانه‌يل سياسى فه‌يلييش بوين ك هه‌ڵخه‌ڵه‌تيان و هه‌وه‌جه‌ وه‌ وه‌رده‌وامى خه‌ڵه‌تانن يه‌كترى نه‌يرن, زوورميان نازانن ك دويا كه‌فتنه‌ و گشت چشتيگيش ده‌ركه‌فت ك ئه‌وه‌گ ديرنه‌ى كارت 37 ساڵ له‌ مه‌ينه‌تيه‌و گيركردنه‌ له‌ ويستگه‌ى سراب و جيوازيان وه‌ره‌و مه‌نزڵ ناكا!

 

كى مه‌يل وه‌ سه‌ركه‌فتن نه‌يرێد له‌ كار و ژيانى؟ بايه‌سه‌ له‌بان ئه‌وانگ روى وه‌ڕوى وه‌رپرسيارێتى ئه‌خلاقى و نه‌ته‌وه‌يى بوونه‌و وه‌ئاشكرا بويشن ك به‌غدا وه‌ فه‌رمى غه‌درمان كرد و كوردستانيش دريغى كرد ده‌رهه‌قمان له‌ڕوى نه‌ته‌وه‌ييه‌و!

 

ئمڕوو گشتلايگ ئه‌تويه‌نن باس له‌ مافه‌يليان و داواكردنى بكه‌ن، وه‌لێ چوين و له‌ كوورا و تا چ راده‌يگ ئه‌و مافه‌يله‌ وه‌رئه‌گريم؟

 

ئاشكراسه‌ ك قه‌ورسانه‌يله‌ پڕن له‌ پاشايه‌يل بيده‌نگ! شاره‌يليش بانگ وه‌ مردگه‌يل ژڕن له‌وانه‌گ هتاف وه‌ كيشه‌يلمان كيشن، وه‌لێ بيلنه‌مان شه‌تاره‌ت راى نه‌كه‌يم وه‌ل ده‌مه‌ورى ئه‌وانه‌گ مافه‌يلمان نادوينن له‌ ژيان ئاسايى و مه‌رگ ئاسايى. هويچ ئاساره‌ى ئوميديگ له‌ژير ئاسمان ئى وڵاته‌ نه‌مه‌ندگه‌ قاپيه‌گه‌ى نه‌كوتيم. كيشه‌ى ئيمه‌ى فه‌يليه‌يل له‌ناوڕاس گشت ره‌نگه‌يل ته‌نيا كيشه‌گه‌ى ئيمه‌ وه‌ ره‌نگ و بوو سياسه‌ت ره‌نگ كريا نه‌ك فيشتر، مه‌يدان سياسييش بويه‌ قه‌ورسان ئه‌را حورمه‌ت و رێزگرتن و شوونيگ ئه‌را ده‌فنكردن گشت ئاره‌زووه‌يلمان و باوه‌تيگ ئه‌را جورعه‌ى ژانه‌يلمان.

 

گشت حكومه‌ته‌يل رووژيگ له‌ رووژان باوه‌ڕ وه‌ مافه‌يلمان نه‌ياشتنه‌ تا ئمڕوو حاشا له‌لى بكه‌ن! به‌ڵكوو ئيمه‌يم ك باس له‌لى ئه‌كه‌يم وه‌ل وه‌رپرسه‌يل له‌ وه‌خت خواردن چاييگ يا په‌رداخيگ قاوه‌ وه‌ بڕيگ له‌ قسه‌و واده‌يل هه‌ڵخه‌ڵه‌تانن له‌رزيه‌يمنه‌و جوور زه‌وى له‌وه‌خت كه‌فتنه‌وه‌ى زه‌ويه‌له‌رزه‌!

عه‌لى حسێن فه‌يلى

 

Shafaq Live
Shafaq Live