شەو یەڵدای کوردی دە تێهران
شەفەق نیوز- هەرچەن کورونا ویرووس، ئمساڵ جوورێ وڵات کردە کونا ک مەردم نەوێرستن لە ماڵ بدەرانە دەر و فرە لە مەراسمەیل کوردیاتی، ئمساڵ جوور جاران و دە کوڕ و شەونشینییەیل و جەرخەیل جەم کوردی نەگیریان، باوجی چالاکەیل کورد هەر کەس وە راس، هەپ و هەوڵ دان ک وە بەش خوەیان نەهیلن ک ئی رێچە و رسوومە بمیننە بان زەمین و لە ویرەو بچن، وەێ خاتره دە شەواچەیل مەجازی و ئێجتماعی واتای (دووری و دووسی) هاوردن وە سوو.
دوکتور مەهین عەباسی، چالاک مەدەنی کورد فەیلی (پەهڵەیی) و بەرپرس لق ژنان جامێعەی ئیلامیەیل تێهران (ج ا م) دە ماڵەگەێ خوەێ و وەرد بنەماڵەگەێ خوەێ، ماڵەچە‌جەژنێ گرت و رێ و رەسمەیل کوردیاتی ئێڵ کورد پەهڵە (کوردەلی)، هن تایفەی زەڕووش ئاودانان، ئەنجام دا وئمشەو، ئی بەرنامە دە شەواچەی تلیفزیانی سەحەر کوردی ئێران، بڵاوەو بی.
شەو چلە یا شەو یەڵدا، شەو وەدی هاتن خوەر و جەژن کوڵەو بیین شەوگار دریژ و دریژەو بیین رووژگار کوڵە و بن و بنچەکێ وە دین مانەوی دڕەسێ ک بنچینەی یارسان و ئێزەدی و ئەهڵ هەقە ک هێمانیش دە جی‌جیێ لە کوردستانات دە ئێران و عراق باون.
ئی شەوە، شەوچەرە و ئاجیل و شامی و هەنار دخورێ و بڕێ وتنە ک گوورانی (شەوچەرەی دیوەخانمی، گوڵ وەنەوشەی باخانمی) ئەڕا ئی شەوە پیرووزە ئەڵوەسریاگە.
