شەن و واێ شەماڵ... بەش دو و تەمام
باوگم هەر گوونیێ پڕ دکرد هەێ شەش بەێت شێعرە دوت و حەسەن گایار دچری
دەنام فکر بۆم حەسەن گایار کیە؟؟؟
ماڵێ ها کوو؟؟
باوگم ڕا چرێگەێ؟؟
ئڕا فەقەت وەخت خەرمان ئەڵگرتن هۆرێ کەێ؟؟
کارێ چەس؟
دە نام فکر بۆم ک خاڵوو مەمەد هات
وت: نام خودا خەرمان زایە!
وەوەر خوەمەو وتم مەگەر خەرمان زاێ؟!
ئەڵبەت تەخسیر ناشتم چۆن زاێن فەقەت ڕا پەس پووڵە دزانسم خاڵوو مەمەدو بەوگم قەێرێ دەم تەقە کردن باقی ئەڵگرتن خەرمان کیشیایە سوو...
ئێوارە هاتیمن ڕا ماڵ،تاتگم هاتۆە ماڵمان ئەۊ هەم ڕا شەن هاتۆ،تەمام هۆر فامم بۆگە "حەسەن گایار"
"حەسەن گایار" کیە؟؟
شەو وتمە تاتگم؛ "حەسەن گایار کیە"؟!
ئڕا باوگم داێم هۆرێ کەێ؟!
تاتگم وت حەسەن گایار گاێ فریەێ دێرێ
وتم ماڵێان ها کوو: تاتگم وت ت ماڵێان نیەبڵەێ!
تاتگم وت: هەر کە خەرمان ئەڵگرێ دێاێ ڕا سەر خەرمان بەرەکەت بەێگەێ!
منیش وتم خودا کەێ دیاێ ڕا سەر خەرمان ئیمە!
تاتگم دەسێ کیشا وە بان سەرم و خەنس و وت:
سوو!
چمان کەوێ دە بان خا گرتۆم شەو تا شەوەکی وە هەوەز دین "حەسەن گایار" نەخفتم.دڵم دخواس خوەم بچم ڕا مالێان و بارمەێ ڕا سەر خەرمان تا شوون زامەت بەوگم فریەو بکەێ!
چووزانی بەوگم وەخت خەرمان ئەڵگرتن چەنێ چەمە رێ فریە بۊن گوونیەێلێ دە لاێ خەرمان بۆ.
شەوەکی گوڵ سوو وەرژە باوگم ئەڵسام و ئامادە بۆم پووت و سرن جەمەو کردۆم، باوگم سوار قاتر بۆ منیشە دە پێشتگەێ خوەێ سوار کرد داڵگم جگەێ کریە ناۊ وە بان چەپاڵێ نان و کلگ پیەنەو کردۆم و ئەو دەمم کەفتۊ ئەو رێ!
چەمە ڕێ "حەسەن گایار" بۊم ک تاتگم وتۆ ئمڕوو دیاێ ڕا سەر خەرمان ئێمە!
باوگم جوور دۆەێکە شڕوو کردە پڕ کردن گوونی و چڕین "حەسەن گایار"
دەسم وە گوونی بۆ و چەمم چەمەرێ حەسەن گایار!
هەر مەلەوەرێ پڕ دگڕت خێاڵ دکردم حەسەن گایارە!
دەسم وە دەر گوونی بەسیاۆ چەمم دە بان ئاسوو گل دخوارد. دی دخواس پڕ کردن گوونیێەلە وە سەر برەسێ ئوو منیش ئمێد وە هاتن حەسەن گایار ئڕام کەمەو بۆ!
وە وەر خوەمەو وتم حەسەن گایار ناگەسەمانە سەر کار هەێ دەێ فکرە بۆم ک ساوڵەێ ئاێمێ دە سەریاڵە پێا بۊ!
ڕووژدەمەو بۆ چمان کەڵێ وە کوچگ کووشتۆم! دەر گوونی ول کردم و وتم با!
با!... "حەسەن گایار" هات!!
وە دەو چگم ئڕا لاێ پێاگ وتم:
هایە خەرمان ئیمەس!
هایە خەرمان ئیمەس!
ڕێوار گووش نەتکان و وە لاێ باوگم کل بۊ سە لامێ کردو چگ،نام دەمم بۆە تەڵەێ تەقیاگ! چمان کەوێ دە دەسم باڵ گڕت!
وە کزەو چگم ئڕا لاێ بەوگم وتم: حەسەن گایار ئڕا نەوسا دە سەر خەرمان!
مەگەر تاتگم دۆەشەو نەوت حەسەن گایار دیاگە سەر خەرمان؟!
بەوگم خەنس و وت:
ڕووڵە! شەوەکی وەرژە ئیمە هاتگەو چگەسە ڕێەو!
ئەو ڕووژە وە چەمە ڕێ دیێن حەسە گایار بردمەو سەر.
خەرمان داگریاو؛ وە قەوڵ بەوگم حەسەن گایار بەرەکەت خسۆ دەێ، ئێوارە جوور شەوەکی باوگم ناگەمە پێشت خوەێ دە کووڵ قاتر هۆلە، هاتمە ماڵ داڵگم مەشکووڵگێ دوو کردۆگە سەر سێ پا،
باوگم!
تاتگم!
م، ک جارێ "حەسەن گایار" وە دی نەکردمە!
