شەن و واێ شەماڵ... بەش یەک
یادێ وە خەێر، مانگ نامگ پاێز بۆ شەوەکی داڵگم چاێ ڕشانۆ شەپێ کڕیە دە لاێ ڕا باوگم ناۆ تا ئەناشتا بکەێ. باوگم شەن وە دەسێ بۆ کلگەێل شەن تنەو دکردو ئەسدواێ شەماڵ دکرد.
واێ شەماڵ وەخت شەن کردن دیات واێ شەماڵ دە ڕاسەو دیات و جوور واێ چەپ نەۆ؛ واێ چەپ هنزاێ واران بۆ و زمسان دیات تا خەوەر واران بەێ، وەلێ واێ شەماڵ خەوەر شەن و خه رمان ڕامان دیاورد.
باوگم ئەناشتا خواردو شەنەێ ک خوەێ بەسۆگه ی نا شانەو؛ وە دەنگێ ک نیشان دە جاێ هاماڵ ئشکن داشت وت:
یا باد بەرەکەت!
شەن ڕا باوگم گشت چێشت بۆ؛ ئەڵبەت نە هە ڕا باوگم، ئەڕا گێشت پێاگەێلێ ک ساڵەێ چەمەرێ ئەڵگرتن خەرمان بۆن!
شەن ێانێ نان!
شەن یانێ پیاگیەتی!
شەن یانێ هامالی!
شەن یان چەم زاڕوەێل وە دەس باوگەو!
شەن یانێ خیرەت!
شەن یانێ...
نیمە ڕوو داڵگم نان تووشگ نا دە نام کیسەو وت: یەکێ دەتان ڕا باوگتان نان بوەێ، چەنێ ڕامان عەزیزۆ نان بردن ڕا باوگ،دروو گه نه من وبراگەم دایم جەنگ جڵاومان بۆ دە بان یە ک کی نان ڕا باوگ بوەێ!
نان بردن ڕا باوگم دە سەر خەرمان شانازی بۆ،داڵگم چەن دان خێارو تماتەو کتری کەلێ وەرد پختێ چاێ نادە نام کیسە ڕام و منی وە خوەشڵەخوەشی بردمێان ڕا لاێ باوگم؛ وەختێ چگم باوگم دە ساێ دارە نیشتۆ، تەماکوو دکردە لوو قاقەز سیکارە وە زوانێ ک هشکۊ تەرێ دکرد باوگم قڵاێ بان زوانێ دیات دیارۆ فریە شەکەتۆ،تەماکوو پڕ کردو نا وە بان لێوێ ئوو وە شەقاتەێ ڕووشنێ کرد باوگم ئاز پووک داێن وە تەماکوو ناشت تەماکوو جگ جگ دە بان لێو خەمبار باوگم دسووزیا، م ماقمەو بردۆە دۆێ سیکارەێ بان لێو باوگمەو، دۆدی وە نازەو خڕ دخوارە دەورسەر باوگمەو، چمان دۆ سیکارە هەم جوور م ئاوەخت خڕ خواردن وە دەور سەر باوگمەو داشت نیەزانم بەوگم ئڕا چە دە نام خوەێ بۆ، وەلێ هەر چگە بۆ ئەو پێاگە ک شەوەکی دەماڵ داوەو دەر نەۆ!
وە داسێ ک دە لاێ بۆ خێارێ ڕام کۆز کرد نوورسمە داسەێ چۆ خەم داو وەلێ چۊ خەم تێوڵ بەوگم نەۊ؛ داس دە دەێشتەو خەم داۆ باوگم دە نامەو!
دوارە یەێ قاقەز تر پڕ کردو ناێەێ بان لێوو ئەڵاژیا ئمجا وە وەر خوەێەو وت:
ئمڕوو واگە کپانێ؛ چگمە ئەوڵاتر قەێرێ سرۆت خسمە هوا وە قەوڵ خوەم جریت وازی بکەم باوگم نوورسمەو گوڕج هێز گرت و وت:
کەرم خودا وا...خەنگ بان سەرێ گرت و چگ ڕا سەر خەرمان، چەنێ رەێن بۆ خەنە خەن باوگم چمان باڵ پڕنەک دە پێلگ دڕات!
واێ شەماڵ وڕکەوڕک دکرد تا م سرۆت نەخسمە هوا باوگم نیەزانس،باوگم وە شەن تەرت دخسە هوا، واێ شەماڵ تەرت دوردو و دانەێ گەنم جوور تڵا دە ئاسمان دواری، کەێ چۆ وەفرخاکە لێوە دە ئەولاتر کوو دبۆ،دانەێل گەنم چۆ تگرە جیلەێل وهار خنجگە دکردن یەێ بار وە کیسەو چووخ باوگم دە لاێ پیژنەێ کردۆگە دار دنوورسم یەێ بار وە تەماکوو بان لێو باوگم ک هەوەس واێ شەماڵ مەفەر پووک داێن وەێ ناۆ، یەێ بار هەم وە کلگەێل شەن ک تەرت چۆ ئاو ناودان دە لاێ کلگەێلێ دڕشیا.
دە فکر بۆم
شەن!
واێ شەماڵ!
تۆشی ڕا مەردم وە واێ چەپ شەن نیەکەن؟!
ئڕا شەن ڕەفیق واێ شەماڵە؟!
سەرم سر ماۆ دەێ هەێس بەیسە!
نیەزانم!!!
هە یە زانم شەن ڕەفیق گیانی واێ شەماڵە؛ هەر وەخت ئەۆ دێاێ یا هێز گرێ،وەختێ ئەۊ کپێ شەن هەم کەفێ، ڕەفیقێ چەن چێشت فرە شنەفتمە چۆ گوڵ و بڵبڵ،شەم و پەروانە وەلێ چۆ شەن و واێ شەماڵ نیین! وەختێ شەنەێ واێ شەماڵ دێاێ شەن هەم چۊ ئاسیاو کەفێگەو کار!
واێ شەماڵ دووس خاێ مەردم بۆ، وە هۆرم دێاێ مەشەی قاسم وەختێ هوورە دکرد ئڕا شەماڵ دخوەنس:
شەماڵ ورکەێ دیاێ چۆ مەیو وە نەرم
دە لاێ قووڵەم دیاێ نەسەردە نە گەرم
چۆ مەیوو وە نەرم شەماڵ تن ڕەو
نامەێ دیمە پیت بەو بەرەێ وە دەو
کوڵ و کوڵوڕ شەماڵ ڕا مەردم هەم عشقەو هەم ژیان!
دە فکر ڕەفیقی شەن و شەماڵ بۆم ک خاڵوو مەمەد هات وتە باوگم بیا تا وەردت پلێ بێیەم!
ڕۆ وە ڕۆ یەک گرتۆن شەن دکردن،تەرت وە مل یەکا دکردن،چمان قڵ و نوات وە مل تازە سۊڕا دخسن دۆماێ چەن ڕووژ رەفیقی واێ شەماڵ و شەن و دەسەێل بێ هچان باوگم خەرمان شەن بۆ، نەوبەێ ئەڵگرتن خەرمان هات شەوەکیانێ بۆ گوونییەێل فرەێ جەم کردۆن چگیم ڕا سەر خەرمان م کارم گوونی گرتن ڕا باوگم بۆ هەر گوونی شەش پووت گەنم جی دگرت بەوگم هەر گوونی ک پڕ دکرد دچری وە حەسن گایار؛ ئەوەڵ پووت دڕشان دوت: یەێ هزار بارو یەێ هزار خەروار!
"حەسەن گایار سەر بارەو دیار"
دوێە دوێە دیارە...یە چەردەێ حەسەن گایارە
سێیم پووت: سێ زەرە دە سینەێ مەمەد نام خودا دە دین مەمەد
چوارم پووت: چوار یار نەبی-حەسەن،حسەێن،فاتمەو عەلی!
پەنجم پووت: پەنج زڕەێ زەڕین مەولا،خەێرو بەرەکەت وە جا
شەشمین پووت: شەش وە نام خودا خوەش!
