رۆل نویسەرەیل لە مقیەتیکردن زاراوەی کوردی خوارگ
![رۆل نویسەرەیل لە مقیەتیکردن زاراوەی کوردی خوارگ](https://media.shafaq.com/media/arcella/1723456252782.jpg)
لەرووی مێژوویی، زاراوەی کوردی خوارگ لەوەر هەڵچگنەیل سیاسی و وردەوردەیل ناوچەیی و پێگەی جوگرافیەگەی رویوەروی ئاستەنگ بویەسە، لەوەر سنوور جوگرافیەگەی و کۆمەڵایەتی سیاسی کەفیەسە ژیر کاریگەری زوانەیل فارسی و عەرەبی و تورکی، ویرەداری و ئازایی و توانایەیل و دڵسوزیان ئەرا زوانەگەیان مەردم ئەو سنوورە هووکار بویە ئەرا لەناونەچگنی کە هەڵبەت نویسەرەیل زاراوەگە پشکی شێر بەریان کەفێد لە مقیەتیکردنی.
مقیەتیکردنی لەناوەین زیایبوین جەهانگیری و باڵادەسی زاراوەیل ترەک و زوانەیلتر فرە گرنگە کە نویسەرەیل رۆل گرنگیگ دوینا وە بەڵگەنامەکردن و وەرەونوابردن و دەوڵەمەنکردن زاراوەگە کە توەنیمن وەیویرە باس لە گرنگی رۆل نویسەرەیل بکەێمن لە پاراستن زاراوەگە:
بەرهەم ئەدەبی:
نویسەرەیل وە وەلیفەت وەرگردن لە شیوەزار کوردی خوارگ بەرهەمەیل ئەدەبی درسکەن کە بریتین لە شیعر، رۆمان، کولە چیرۆک، وەی کارە نەک هەر زوانەگە دەوڵەمەن کەێد بەڵکم زینگ مەنن زارەوەگە ئەرا نەوەیل ئایندە مسۆگەر کەێد.
بەشداری ئەکادیمی:
بڕیگ لە نویسەرەیل بەشداری لە توێژینەوەی زانستی کەن، وە بەرهەمهاوردن رێزوان و فەرهەنگ و توێژینەوەی زوانەوانی کە لەریانەو هویردەکاریەیل زوانەگە بەڵگە کەن، کە سەرچەوەی گرنگیگن ئەرا پەروەردەیی و لێکۆڵینەوەی زوانەوانی ئایندە.
نوینەرایەتی کلتووری:
فرەیگ لە نویسەرەیل چیرووک فۆلکلۆری نەریت و گورانی و مێژووی زارەکی وە شیواز کوردی خوارگ کووەوکەن و نویسنێنەیان، وە پاراستن ئەدەب زارەکی دەسمیەتیدەرە ئەرا پاراستن ناسنامەی کولتووری و وەردەوامی مێژوویی.
میدیا و بڵاوکریاگەیل:
لەری ریگەو نویسەرەیل بەشداربوون لە رووژنامە و گۆڤار و پلاتفۆرمەیل ئۆنلاین، کە ناوڕۆکەیلیان وە شیوەزار کووردی خوارگ بڵاوکەن، یەیش دەسمیەتیدەر فرەخاس و گرنگیگە لە بڵاوکردن و وەرەونوابردن زارەوەگە لەمچوارچمگ هاوچەرخ.
جی باس کردنە، نویسەرەیل لە ئەنجامدان ئەرکەیلیان هەمیشە رویوەڕوی ئاڵناکاریەیلیگ بوون جویر سنوورداربوین سەرچەوەیل و بەرخۆدان سیاسی و باڵادەس زوانەیل ترەک و فرەگ لە گیچەڵەی ترەک کە هووکارن لە ریگریکردن تەقەلایەیلیان لە وەرەونوابردن و پاراستن زاراوەگە.
خوەشبەختانە، پیشکەفتن تەکنەلۆژیا و سۆشیال میدیا پلاتفۆرم نوو دەرفەتیگ پیشکەش وە نویسەرەیل کەێد تا بتوەنن بڕەسن وە ئیسفاکەر و خوەنەر زیاتریگ و بەشداریکردن لە تەقەلایەیل پاراستن زوان وەێ شیوەی کاریگەرترە.
لە ئەنجام رەسیمینە ئەو خاڵە کە نویسەرەیل گرنگی پێشەنگیگ دیرن لە پاراستن و وەرەونوابردا شیوەزار کوردی خوارگ، چوینکە لەری کارەیل ئەدەبی و ئەکادیمی داکۆکیەیلیان، بەشداریکەن لە هیشتنەوەی زاراوەگە وە زینگی.
وە وەردەوامی پیشگیرکردن لەی تەقەلایەیلە فرە گرنگە، دڵنیایی دەێد زارەوەی کوردی خوارگ جویر بەشیگ زینگ و گەشەوەخوەی دی لە میرات کولتووری و کوردی مەنێیەو مینێد.