بابەک دەوڵەتی ، شاعرێگ ئەڕا بانان
شەفەق نیوز- هە ئەوقەرە ک "شامی کرماشانی"، پیاگ نابینا و بێسەواد کورد، گەوراترین جەراحی دە شێعر کوردی کرماشانی کرد و زوان گووران نا وە لا و یەکم شێعر ئێجتماعی کوردی کرماشانی وە نام "کرانشینی" ئوو یەکم شێعر سیاسی وە سنگە‌ێ پرسیاریێ دە شێعرێ وە نام "دوکتور موسەدق، تەکیفمان چەس؟" وت و حەتتا یەکم غەزەڵ عەرووزی‌وەزن "وڵم کە" ئەڵوەسی و وە تیز و قەژمەری وت: "یا فراق ئاخر کوشێدەم، یا خەم ئەشعار نەو" و هەمجا وت: "ئاو و خاک قاڵب نەکردە، گڵ وە پێ ئویشن نە خشت" فتوا دا ک شاعرەێل کورد نەکەفنە شوون شاعرەێل نووخواز فارس‌زوان، خوەێ نەزانست ک وهێ سێ کارە گەپترین نووخوازی دە فورم و موحتەوا و زوان کوردی کرماشانی کردگە و نەزانستە بییە وە سەرەتاێ جمێشت شێعر نوو کوردی، دومڵی ئەوی تەمکین و ئمجا پەرتەو وە غەزەڵ وتن ئەو کارە بردنە رەسەت، هەمجا خاسە یە بویشیمن ک یە "بابەک دەوڵەتی" بی ک چۆچشتێ دروو نەوتیمنە ئەر بویشیمن ک دوارە بنیانەێلە ئەڵتەکان و زەێنییەته‌ێلێ ک خوەیان پەسا دبین وە سوننەتێگ نووی، دوارە ئەو شەک‌شەکان.
ئی شاعر نووخوازە، بی وە رێچەشکن و رێ‌وازکەر.
دە ئی بەشە دە دەمنێشەت بابەک دەوڵەتی دنیشیمن. کەسێ ک وەچەواشەی شامی کرماشانی، وە ئاگادارییەو ئی کارە کرد.
هە وەوچۆنە ک وتیمن شامی، هەرچەن ک یەکێ لە گەوراترین نووهاوەری دە شێعر کرد، خوەێ وەێ ئاگا نەبی ک چ کار گەپێ کردگەو دەرانەێل "شێعر نووی" وتن وە روویێ شێعر کوردی خوارین چەکان و هەم شێعر کوردییش سیاسییەو کرد و هەم ئێجتماعیێ ئوو هەمیش لە زوان کۆچە و خیاوان و وە قسەێ شار و دێ یارمەتی گرت و گەشە دا وە زوان شێعر کوردی ئوو یە بی وە بنەوایێگ ئەڕا نووخوازییەێلێ تر تا شێعر کوردی مەزووکەو نەکرێ ئوو دە زاوەرانەێلێ تر، کەسەێلێ جوور بابەک دەوڵەتی بیارێگە دی.
شەفەق نیوز/ خاسە خوەت وە دەم خوەت ئەڕامان بویشی ک بابەک دەوڵەتی، کێیە؟ خوەت چوون دناسیتەی؟
بابه‌ك ده‌وڵه‌تی : ئه‌جه‌و پرسیار سه‌ختێگە!
بایەد بویشم؛ کاتێ ک وه ده‌یشته‌و وە بابەک دەوڵەتی دنووڕم، چمان هه له‌ی ژیانه، هەمیشان هە دونادوون وه چهاو دییه. فره له ئایمه‌یل لهێوا نیین. چمان دە ئی چل‌و‌چه‌ن ساڵه ئایمه‌ێل جیاوازێگ وه ناوێ بابەک دەوڵەتی هناس کیشانه.
ئی بابه‌که ک ئیسه دبینن فره وه گه‌رد ئه‌و یەکان فه‌رق دکەێ. ئی ته‌وفیره وه مانای خاس بیین و به‌رز بیین هیچ کامەیان نییه. ئامانج قسه‌گه‌م یه‌سه ک هه‌ر کام له‌ێ بابه‌که‌یله، تایبه‌تی خوه‌یان دیرن. یه‌کێ مناڵێگە وه‌کو گشت مناڵەیل تر، یه‌کێ فره پڕ له هه‌ستە، یه‌کێگ تر زاناسە ، یه‌کێگ نه‌زان، یه‌کێگیش فره بێ‌بەزەێیە. ئی هەمگە شێواشێوە دە دەروونێ هن یه‌سه ک ئێسە وه گه‌رد فره لەێیان خه‌ریوی‌دکه‌م
شەفەق نیوز- شێعرەێلەگەێ چە؟
بابه‌ك ده‌وڵه‌تی : شێعره‌گانێیش وه‌کوو خوه‌ێ گره‌وشیانه.
وه‌ختێ جووان‌تره‌ک بی ئاشقانه دنووسان که‌مێ نووا‌تر ئەوە چگە شوون شێعر ئێجتمایی ئیسه‌یش خۆ فێشتر هیردەو بییە ئەڵە ژێرخوان هه‌لبه‌سته‌گانێ. هه دە بنزار فارسییش ئی رێیه گرتگەسە وەر و دە رێگە وە چاو خوەێ دییە ک فره سه‌خته وه‌ختێ گشت شاعره‌گان هە وە هەست و ئێحساس پەتییەو دنووسنن، یه‌کێ بیاێگ و سه‌ر جیا بکه‌ێ ئوو لە چشته‌ێل تره‌ک بنووسنێ. وه راسی دوروسییەگەییش هه یه‌سه. نەدبێ تا رووژێ ک دمریمن هه جوور وەختێ ک نوونمامێ شانزه‌ساڵان بیمنە بنووسنیمن.
شەفەق نیوز-شێعر فارسی وتن ئەڕات ئاسانە؟ یا کوردی وتن؟
بابه‌ك ده‌وڵه‌تی : وه چەمسار منەو شێعر هە یەک زووان دیرێ "زوان شێعر" ک خوەێ زوانێگە جه‌هانی هەرچەن ک دە هەر جیێ، بڕێ یاسا دیرێ ک بایه‌س دە هه‌ر جیێ بگرنە وەر چاو و رعایەت بکرن. یه‌کێ تازه بیینە. خاسترە ک هەمیشە چشتێ بنووسرێ ک وه‌ر ژە ئەوه نه‌نووسریابی. له‌ێ باوه‌ته فارسی و کوردی هیچ فه‌رخ و جیاوازیێگ وەل یەکا نه‌دیرن ئوو گشتێ وه یه کەفتگە ک چه بنووسنیمن.
هه له‌ێ باوه‌ته چوون له کوردی که‌متر نووسریاگە کار کردن دە بنزار کوردی ئاسان‌تره. نویسه‌ر ئه‌گه‌ر که‌مێ زه‌ێن بداشتووبێ وه ئاسانی دتوانێ هه‌م وهێ بنزارە خزمه‌ت بکه‌ێ ئوو هه‌م خوه‌ێ جیاوازەو ببێ.
شەفەق نیوز- ئایا لەولا وەرەو ئیلا هاتیت و لە فارسی وتنەو هاتیتە کوردی وتن؟ یا لەێ‌لا وەرەو ئەو لا؟
بابه‌ك ده‌وڵه‌تی : یه‌کم جار وه گه‌رد شێعر کوردی هجایی، دەس‌کردمە شێعر وتن. راسییەگەێ شێعر خۆ نەبین چوون نه خێاڵ فره‌یێگ دە نامێ بی ئوو نه فکر جیاوازێ. ئێکه چیمه شوون فارسی نووسانن. چه‌ن گله کتاو چاپ کردم. شوکر خودا، چەنە زامه‌تێ ک کیشام له‌و بنزارە قورپ و لا و جی هاوردمەسە دەسەو.
چه‌ن ساڵه ک حس کردمە بایەسە وه زووان داڵگی بنووسنم وهێ همیرە ک وه نویسه‌رەێل زوان کوردی خوەمان رێیەێل تازه‌ترێ بدەمە نیشان بەشکەم لایین‌داره‌یل زوان کوردییش وە بەش تەواناێ م رەنگێ، قسه‌ێل جیاوازێ بژنه‌ون.
شەفەق نیوز- شێعرەێلەێ تو ئی جیاوازییە لە ئەو دووەێ شاعرەێلەێ "ئەڕا زوان" هام‌لف خوەت دیرن ک فرە نوستالووژیک نیین ئوو نووخوازانه‌ن؟ چەنێ زاڵ‌بیین ئیوە دە مل شێعر پێشکەفتەێ فارسی، ئیجوورە هنت کردگە؟
بابه‌ك ده‌وڵه‌تی : م ئەڕا نوو وتن زامه‌ت نەدکیشم و خوه‌م عەزاو نه‌ددەم. م هه لهێوا فکر دکه‌م. ئی ویر کردنەێلمه وه هه‌ر زوانێ بنووسرێ فه‌رخ نەدکه‌ێ هە خوەێ وەێجوورە شکڵ و شێوەێ دگرێگە خوەێ‌یا.
م وه‌ختێ ک هاتمه شوون کوردی نووسانن هووشم بی ک جیاواز بنووسنم . ئه‌گه‌ر له‌واێ گشت بنووسانام وەێ بیر و باوڕ خوەم؛ ته‌نیا هە خوه‌م رسوا کردبیم.
نوستالووژی ئەڕا یه‌کێ دو جار خاسه باوجی وه‌ختێ گشت قسه‌گان ببێگە نوستالووژیک نووسانن، شاعر شێوه‌ی ریش‌چه‌رمگەێلێ دگرێ وە خوەێ ک یه‌ک به‌ن له شاریوه‌ر ۲۰ قسه دکه‌ن، هەر کەس نەزانێ چمان له‌و کاته وه ئه‌سیری گریانه و فرە نەخش گرتنەسە مل و دیاری دیاری بینە دە ئەو بەێنەێلە.
شەفەق نیوز- راسێ بویش، ماموستا، تو خوەت شێعرەێلەت ئەڵوەسی؟ یا یە شێعرە ک تو ئەڵوەسێ؟
بابه‌ك ده‌وڵه‌تی : له قه‌دیم عه‌ره‌وه‌یل فکر دکردن هه‌ر شاعرێگ یه‌ک گله جنووکه ها خزمه‌تێ. ئمجا ئه‌و مڵاکه‌ته‌سه ک کارێ دکەێ تا ئی ماناێله وه زه‌ێن شاعرەگە بڕەسێ و زه‌قینه بدرێگە دڵێ.
فورمالیسته‌یل رووس چه‌واشه فکر دکردن. ئه‌وان نه‌زه‌ریان یه بی ک
ئڵهام وۆجوود نه‌دیرێگ و شیعر بایه‌س بسازرێ
ئالکسی تولستوی ئویشێ: " هیچ وه‌خت فکرێگ له تۆک قەڵەم که‌سێگ رێیه‌و نه‌گرتگه
باوەڕ م یه‌سه ک ته‌نیا هە یه‌کمین لابەیت یا یەکم لابەێت شێعرەگە هامه‌ێ ئاسمانه پاشمه‌نه‌ی شیعره‌گه بایه‌س بسازرێگ. پاشمه‌نه‌ی شێعر، داوه‌سیاگ وه یه‌سه ک شاعر چه‌نێ زاناسە، زانایی ژیانێ چه‌نێگه، ویره‌گانی چه‌نێ دهەرزێ و... به‌لی م خوەم شێعره‌گانم هه‌ڵوه‌سم.
شەفەق نیوز- دتوانی جواو ئی پرسیاریمانە نەدەیت.
بابه‌ك ده‌وڵه‌تی : خوەزەو وە ئەوە ک خاون خەون و خێیاڵەێلەتە دەو هەنسا ک سەفنە دبەێگەت و دش دکەیتە دنیاێ شێعر و شاعری.
ئەگەر شێعر عاشقانە دیری، راسییەگەێ چەسە؟ ئەو مەعشووقەێلە خێیاڵاوییە؟ یا راسکانی؟
وتیمن ئەر دخوازی لە مل ئی پرسیارییە ئەڵپەڕیمن.
م فرە شێعر عاشقانه نەدنووسنم،
جواو ئی پرسیاره‌یش ئاسانه خخخ
کتاو کوردی خه‌و شێعر عاشقانه له ناوی نییه.
وه‌ر ژە یه‌یش کتاو غه‌زه‌ڵێ وه زوان فارسی نووسانم وه ناو" هزار سال نمک زیر پلکهای من است" ئه‌و کتاوەیش هه لهێوا بی.
ئەڕا ریش‌چه‌رمگی م شووره‌ییه
ئمجا بچیمنه دیار خێیال، شێعر ئامێژه‌یێگه له خێیاڵ و ماناێ راسکانی. ئه‌گه‌ر فره راس و پاک قسه بکه‌ی دبێگە وتار دان.
ئه‌گه‌ریش فره خێیاڵ داشتووبێ دبێگه چه‌وچه.
خێیاڵ هه‌م بایەسە نوو‌خوازین و جیاوازی ببێ هه‌م قه‌ڵخانێگه ک شاعر له پشتی خوه‌ێ بشارێگه‌و.
شێعر، وە بی‌خێیال دبێگە نمونه‌ی رئالیسم. ژان‌پول‌سارتر وه‌تگه: "رئالیسم له هه‌ر کووره ک کل ببێ، دە ئه‌وره‌ێلە دی گیا سه‌وزەو نه‌دکه‌ێ"
شەفەق نیوز- ئەو شاعرەێل کوردە ک دوزوانەن ئوو شێعر فارسی پێشڕۆ دویشن، وەختێ دیان شێعر کوردی دویشن دوارە نهات گرێگەیان دچنە نام فەزاێ ئەێت ئشکەفت‌نشینی و دەوار و مەشک و دوو.
راسێ بخوازی ئایم بایەد پەسەێ چەکمە و پووتینەگەێ ئەڵکیشێ و جوور کێوەگەردێگ دیاری نام‌قەێ ئەوبجەڕنێ ئوو شێعرەێلەیان بخوەنێ لەبەس ک باس ئی کێوە و ئەو دەروەن دکەن ئوو هانە نام چین سەرەتایی ئەدەبیات پاستوراڵ یا شوانی.
ئەڕا لەێ‌واسە؟
بابه‌ك ده‌وڵه‌تی : یه‌کێ په‌سه‌ن وەردەنگەێلە و بیسه‌ره‌گانه. خۆ دیاره ک مه‌ردمِ ئی ده‌و‌ر و گرده له ته‌بیعەت و دەر و دەێشت و هەر چێ سرۆشتییە خوه‌شیان دیاێگ. به‌ڵام له‌ی ناوه شاعر خوەێ بایەسە بزانێ ک چە بایەد بگرێگە مل خوەێ، ئه‌گه‌ر بتواێ ته‌نیا هە وه په‌سه‌ن ئی خەڵکە بنووسنێ ئەنی خوه‌ێ له‌ێ ناوه چ کاره‌س؟
ده‌لیل تره‌ک شایه‌دیش غوروور ببێ. له یه‌ک باوه‌ت وه لاێ خوه‌ێیەو بویشێ ئایا ماموستایێگ دتوانێ له شێعره‌گانِ منِ رخنه بگرێ ئوو بویشێ وەم ک لهێوا نه‌نووسن و شێوه‌ی نووساننت جیاوازەو بکه؟
له باوه‌ت تریش ئی وه‌زیفه له ویرێ چگه ک وه گه‌رد هه ئی شێعره‌یله‌سه ک شاعریش وە بەش خوەێ دتوانێ په‌سه‌نیەێ مه‌ردمەگە ببەێگە بان‌تر لە یە ک هەسە.
شێعر نووسانن له باره‌ێ دار و ئشکه‌فت و مه‌شکه گه‌ن نییه وه شه‌رتی ک جیاوازەو بکرێ. وه مەرجێ ک له ده‌روه‌چ تازه‌ترێگ وه‌و مانا بنووڕێ، نه یه ک په‌نجا شه‌س گله که‌لیمه ببکرێ وه مزدوور و هه له‌ێیان کار بکیشرێ، چه‌سه مه‌ردم خوه‌شیان دیاێ، ئەر هە یەسە دخوازم هە خوەشێیان نەیاێگ!!!
شەفەق نیوز- جوور ماموستایێگ ک ده ئەو پەڕاێ شێعر وسایتە، چەنێ شێعر کوردی دە ئیلام و کرماشان، لە چەمسار خوەت ئەڵوەت، هانە نوا لە ئەوساترەێلەێ خوەیان یا چەنێ مانەسە دوما لەو چشتە ک بایەد ببن؟
بابه‌ك ده‌وڵه‌تی : هێمان هایمنه سەرەێ رێیەگە.
فکر بکه ، باپیرم خان‌مه‌سوور گه‌ورا وه گه‌رد شاکه ، له ده‌وره‌ێ نادرشا قەیرێ شێعر وتنه، ئی چراخه کوژیاگە، سه‌د ساڵ دوماێ ئەو "سه‌ی ساڵح" و "سه‌ی یاقوو" قەێرێ تره‌ک نووساننه، ئێسەیش بڕێ تره‌ک. ترسم ئی چراخه بکوژرێ ئوو سەدەێ تره‌ک ئایانا رووشن بکرێ ئایانا نه؟ چشتێ ک لازمه یه‌سه ک ئی ئه‌ده‌بیاته بەردەوام ببێ، ههرچێ ک قووڵەو ببێ، ههرچێ ک فره‌وا ببێ همیر فێشترێ هه‌س ک زینگ بمینێ. ئی کولتووره فره کار دیرێ تا دی خێیاڵمان ره‌حه‌ت ببێ ک هیچ ره‌شه‌وایێگ له به‌ین نیه‌وه‌ێگەێ.
شەفەق نیوز- ئەوسا مووسیقی، دوفێشتر ساز و دوهوڵ بەس و پەیوەنێ بی دیاری ئەڕا گەشە داین وە بەیت ئەڵوەسین و شێعر فوڵکلور وتن ئمجا تەموورەژەنی‌یش ئەڕا خوەێ بنەوایێگ بی ئەڕا گەشە داین وە شێعر عرفانی و ئایینی کوردی، چمان شێعر نووی کوردی، ئێسە ئەو بەس و پەیوەنە وەگەرد مووسیقی نووی، نەگرتگە، ئەڕا؟
بابه‌ك ده‌وڵه‌تی : گوورانی وه‌تن خوه‌ی کار جیاوازێگه. له زاراوه‌ێل تره‌ک فره که‌س هه‌ن ک ته‌نیا هە گوورانی ئویشن و کارێگ وه شێعر نه‌دیرن. به‌ڵام له‌یره وهێ ده‌لیله ک شاعره‌گان فره نیین، ئیمه له‌ێیان دخوازیمن ک هه وه‌و جووره ک شاعرن گورانییش بویشن. گوورانی‌وێژ که‌سێگه ک مووسیقا بناسێ. بێ ژه شێعر، مه‌قامه‌گانیش بناسێ ، ته‌رکیب بزانێ ئوو فره چشته‌ێل تره‌ک.
شەفەق نیوز- ئەر دە ویرت ببێ، جاران دە ئەڵپەڕەکی ئیمە رەخس و دەس‌گرتن ژنانەئەڵپەڕ داشتیمن ک ده‌سەێ ئەڵپەڕەکی پیاگەێلەێش ژنانەئەڵپەڕ دکرد، رەخس یەک‌ژن و یەک‌پیاگیش داشتیمن وەیەکا، باوجی چمان هیچ وەختێ شێعر ژنانە ئەڵوه‌سین حەتتا دە نام ژنەێل شاعر کورد، خوەیانیش باوەو نه‌بییە، حەتتا ژنەێلە‌یش پیاگانە وتنە، شێعرەێلێ ک دە لاوەلاوە خوەنستنە ژنانە نەبینە ئوو کەمتریش زاڕووانە بینە، تونیش هە لەێ‌وا ویر و هرزتە؟ یا نە؟ ژنانەنویسی دە لای ژنەێلەێ لاخوار کوردستانات ئوو دە لاێ پیاگەێل ژنانەنویس، چوونە؟
خوەت ژنانەنویسی کردیتە؟
بابه‌ك ده‌وڵه‌تی : وه راسی هه له‌ێ‌واسه ک فه‌رمایش دکەی.
ئیمه بایه‌س له ویرمان نه‌چوو ک ته‌نیا هە یه‌ک سەدەسە له‌و پیا‌گ‌وەزووری خه‌سه دوورەو که‌فتیمنه ئمجا له‌ی سەدەێش ته‌کان و شه‌کان فره داشتیمنه لهێوا نه‌‌بییه ک ده‌نگ ژنه‌یل شه‌شدانگ بژنه‌ورێ یە هن یه‌سه ک له جه‌رخه‌ی شاعرەێلە، خانمه‌یل شاعر که‌مترێ دیریمن ئه‌گه‌ریش که‌سێ بییە فێشتر ده‌نگ پیاگ له هه‌ڵوه‌سته‌گان ژنه‌ویمن تا ده‌نگ ژنانه. ئی باسه، ته‌نیا هە له باره‌ی کولتوور کوردایه‌تی نییه، فارسه‌گانیش هه ئی گیر و گرفته داشتنه.
ئیسه وە به‌ش دوێم بەش پرسیاره‌گه‌تان جواو دده‌م.
ده‌روون‌ناسه‌گان ئویشن رووح هه‌ر کام له ئیمه دو به‌ش دیرێ؛ به‌ش ژنانه و به‌ش پیاگانه. ک ناوێیان نانه: ئانیما و ئانیمووس. پیای ک فره پڕ لە هه‌ست و ئێحساسه به‌شە ژنانه‌گەێ وە زوورە و ژنێ ک له ماوه‌ی سه‌ختێ چه‌نه سه‌د گله پیا تێکۆشانێ هه‌سە به‌شە پیاگانه‌‌گەی فێشترەو بییە.
لهێوا ک دنووڕم، شێعره‌ێلەێ م پڕشه‌ی شه‌ڕێیان دیاێ ئوو فێشتر وه ئێحساسەو هانه شوون فکر تازه.
لهێوا فکر دکه‌م ک شێعره‌ێلەێ م لایه‌ن ژنانه‌ی که‌مترێ دیرن ئەڕا خوەیان.
شەفەق نیوز- تاکمەدەنگێ دژنەویمن ئەڵوەت دە نام شێعرە عەرووزییەێلە دوفێشتر، بڕێ جمەوجوولەێ دکەن ک عەرووز کوردیزەو بکەن و ئێختیاراتێ بیارنە دی. ئی کارە چوونە لە چەمسار ئیوە؟
بابه‌ك ده‌وڵه‌تی : عه‌رووز زانست و عڵمێگه جوور بیرکاری یا هه ئه‌و ریازی خوه‌مانه. م وەێ باوڕەمە نەدتوانیمن ک هه‌ر جوورێ مه‌یلمان کیشا یاساگانێ جیواەو بکه‌یمن.
عه‌رووز کارێ وه مانای که‌لیمه‌ێلە نه‌دیرێ. عه‌رووز ته‌نیا هە ده‌نگ دناسێگ و بەس. م نه‌زه‌رم یه‌سه ک چوون وه همێد خودا دیریمن له شێعر هجایی کووچ دکه‌یمنه شێعر عه‌رووزی ئی باسه‌یله دکرێ. نەدبێ هه‌ر وه‌خت دڵمان بخوازێ یه‌ک گلە هجای بڵن کیشیاگ بزانیمن و هه‌ر وه‌ختیش نه‌توانسیمن وه‌زنه‌گه پووڕنیمن بویشیمن کیشیاگ نییه و بڵنه.
له لای منه‌و عه‌رووز فارسی و عه‌رهاوی و کوردی هیچ فه‌رخێ نه‌دیرن. مه‌گه‌ر جایێگ ک ئیمه ده‌نگێ داشتووبیمن ک له زووانه‌ێل تره‌ک ئه‌و ده‌نگه نهبێ. م لهێوا فکر دکه‌م ک ( آی) وه گه‌رد ( ئاێ) فه‌رخی نه‌دیرن. هه‌ر دوگیان کیشیاگ هساو دبن فه‌قه‌ت ( نگ) دمینێ دە وشه‌ێلێ جوور شه‌نگ و ده‌نگ. م خوه‌م ئەیانه وە بڵن هساو دکه‌م به‌ڵام ماموستاێل بنیشنه یه‌کەو ئه‌گه‌ر وتن بڵنە خۆ بڵنە ئه‌گه‌ر وتن کیشیاگە خۆ کیشیاگە مەبەستم یەسە ک داڕێشتی یا قانوونێ بنن تا منیش ناو شیعره‌گانم هووشم ببێ ئه‌و قانوونه رعایه‌تەو بکه‌م. چوون بویشم؟ ک ئی هەر کەس ئەڕا خوەێیە وه پیر عەیوه، وه په‌یغه‌مه‌ر شووره‌ییه، دە بنزارەێل تر زوانه‌ێل تر وه‌ختێ بژنه‌فن ک ئیمه هێمان له بان عه‌رووز باس دکه‌یمن و وە یەکا ئێجماع نەکردیمنە چۆچشتێ وه‌مان دخه‌نن.
شەفەق نیوز- ها ویرم ئەوسا وە خاتر نووخوازییەێلەت، بڕێ کوانەپەرەس، دواریان وەت ک بابەک دەوڵەتی، دخوازێ شێعر کوردی بشێونێ، یەمە ئەوان نەمانە و وەرەو ئەو رێگە ک تو ئەوچەکانی، هزاران دەروەچە دەێلا و دەوڵاێیەو چەکیاگە، باسێ لە ئەوسا و ئێسا بکە ئەڕامان
بابه‌ك ده‌وڵه‌تی : گشت ئه‌وانه ک ئەڕا زوان داڵگی زامه‌ت کیشانه دووسێیان دیرم و وه گه‌ردێیان ره‌فێقم وه‌لێ دی ددیم وه‌ختێ هاتگە ک کەسێ هێز بگرێگ و ده‌س بوەێگە با‌ن‌و دووده بگرێ.
فێشتر شێعره‌گان له به‌حر ره‌جه‌ز بی، ئەڕا؟ چوون ک هه‌م وه وه‌زن دەهجایی خوه‌مان نزیکە هه‌میش شیعر ( ئه‌رمه‌نی) مامووستا په‌رته‌و له‌و وه‌زنه نووسیاگە. خۆ وه‌ختێ هات‌بی ک وه‌زن نووترێ بیارێگە وه‌ر بەشکەم مانای نووێ بویشرێ. شایه‌د ئیمه خوه‌مان وه سه‌رهه‌نگ و سه‌رتیپ بزانیم وه‌لێ مه‌ردم سه‌ربازِ ئیمه نیین ک ده‌ستووره‌ێل تکراری ئیمه بژنه‌ون و تاس‌که‌واو تکراری پادگان بخوه‌ن و ده‌نگیش نه‌که‌ن.
شەفەق نیوز- ئاخرین پرسیار؛ شێعر کوردی ئمڕووژمان، هه‌وه‌جه‌ی چه‌س؟
بابه‌ك ده‌وڵه‌تی : بایه‌سە هه‌ر کام له ماموستاێلە چه‌ن گله شاگرد و شاعر دە شوون خوەێ ئێوەت بکه‌ێ تا وجاخمان کوورەو نەبێ.
م له سەرەتاێ کارەگەم دوتم ک شێعر کوردی تازه چووزه داگە و هیچ نه‌ویشیمن تا سه‌قام بگرێ ئێسه دی وه‌ختێ ره‌سییه رخنه بگریمن لە یەکترەکی تا دومای سەقام، دەوام و بەردەوامیش بگرێ، وه‌ختێ ره‌سییە تا ماموستاێلە دە بارەێ گشت چێ، دە بان هەر چێ ک نووسرێ قسه بکەن تا نوونمامەێلە فه‌رخ خاس و خراو بزانن. نه‌بایه‌د بترسیمن. وه گه‌رد یه‌ک مکیس و تارف نه‌که‌یمن، ئه‌گه‌ر یه‌کێ ئاوه‌کی دنووسنێ بویشیمن وەێ یا دتوورێگەو ئوو دچوو په‌ی کار خوەێ چوون شێعر و شاعری کار و بارێ نییە ئوو له یه فێشتر ئی زوانه ویران نیه‌که‌ێ، یا کەفێگە رێ خاس و دیاێگە سەر هێڵ.
شاعر کیه‌نی نییه ک عمرێگ قوڵ بخوەێ و وشکەو نهبێ. شاعره‌ێل کورد بایه‌سە هه‌لوه‌سته‌ێل گشت کولتووری و هن میللەتەێلێ تریش بخوه‌نن تا بزانن ئەڕا گه‌ورا بیین زوان داڵگی چ کاره‌ێلێ وەگەرەکه ک بکرێگەو هه له‌‌ووا ک " نیما یوشیج" هووکارە وە ئەدەبیات فه‌رانسه و بی و هات ئی کراسه بڕی و چشت نوویێ دووران.
لە ویرم نەچوو ک ئی مه‌ردم نازاره وه ئیمه دڵ به‌سانه نە‌بایەد که‌م‌کاری بکه‌یمن و ههرچێ ها له تەوانامان بوه‌یمنه کار تا شیعر خاس ترێ بنووسنیمن ئوو ئێسە ک هەسەمان و دتوانیمن دە بارەێ شیعرەێلەمان بویشیمن یا خاس‌وڕاسێیان بکەیمن بهیلیمن ک رخنەگری لەمان بکرێ چوون دە بانان، چ بخوازیمن و چ نەخوازیمن، گشت کاره‌ێلەمان داوه‌ری دکرێگ ئەوەیش بانانێ ک ئیمه دە نامێ نییمن تا له خوه‌مان دفاع بکەیمن.
-سپاس کاکە، دەمتەقەی فرە خاسێ بی، دەنگ و هناست بژیا
-منیش فرە هاتمە سەر کەیف، ئەڕاتان سەربەرزی و پێشکەفتن فرەترێ دخوازم، سەڵاممان وە برا و خوەشکەێل کورد فەیلی هام‌زوانمان دە ئەو دیم بڕەسنن. بنیشنە خوەش.
