کووئاهه‌نگ (رێ) دەرهاتە دەر
شەفەق نیوز- ئەڕا یەکم جار، کووئاهەنگێگ وەگه‌رد شێعر و ئاهەنگ بهەرز و فاخر، وە بەشداری دو هونەرمەند کرماشانی و یەکێ لە هونەرمەندەێل کورد دانیشتەێ تورکیە دەرهاتە دەر.
بێ‌ژە مه‌زموون و ناوەڕۆک و شێعر و ئاهەنگ تایبەتی ک کار نوو و جیاوازێگە ئەڕا لاخوار کوردەواری، موناسبەتەگەێ ئی کارەیش تایبەتی وە خوەێیە.
نام ئی کووئاهەنگە (رێ) نریاگە ک لە نام فیلمە دیارییەێ (یوڵماز گۆنای) فیلمساز نامدار کوردزوان گیریاگه و ئی گوورانییه‌ێلە ئەڕا رێزداری لەو هونەرمەند گەورا وتریانە و خوەنریانە ک یەیش خوەێ کار تازەیێگە دە کار کوردی.
شێعرەێلەێ ئی گوورانیێەێلە هن دوکتور عەلی ئوڵفەتیین و گوورانی‌بێژەگەییش سادق جەلیلیانە ک هەر دوگ کرماشانیین و ئاهەنگەێلەێ هن کوردستان تورکیەن.
عه‌لی ئوڵفەتی، نووخوازترین و نوارۆوترین شاعر سەردەم کرماشانە ک شێعر و تەرانەێلە‌ێ ئێڵیاتی و هووزیاتی نیین و بار ئنسانی و رەنگ و بوو کوردیاتی و هەست کوردایەتیێگ تر دیرن و هەمجا شێعرەێلێ جەهانیین نە ناوچەئی و نەیش هەر ناسیووناڵیستی پەتی.
