ویریاری گشتی
یەکم وڵات‌چڕی ماڵگە (زانست)
دیریمن پا دنیمنه نام سەدەی پانزەێ هەتاوی، دە ئێران.
دڵتان خوەش و رێگەتان گەش
دە ئی چەن سەدە ک نایمنەسە پشت سەر، تا وە ئێسە یە هە لفانەگەێ مووسیقی و گوورانی وەرد شێعر بییە ک جوور دو فاکتوور دیاری توانستگە زوان و فەرهەنگ کوردیاتی بپارێزێ و نەهیلێ لە ناوە ئەڵگیردرن، پرسیاری سەرەی ساڵ ئی سەدەێ ئیمە یەسە ک ئایا ئی سەردەمەیش هەمجا شێعر و مووسیقی، دتوانێ وە تەنیایی ئی بار گرانە ئەڵبگرێ؟ ئوو ئایا یەمە ک دی گشت وڵاتوەندەێلە لە پەڕەو شاروەندەو بینە، هە کوردیاتی و ئێڵیاتییەری یانێ کار فەرهەنگی کوردی؟ یا کوردایەتی و کار کوردی شارمەندی و مەدەنی کردن ماناێ نووی کار کوردییە؟
همیرمان یەسە ک بنەڕا ناین ماڵگەێ (زانست) و کار وە دو وەرە کردن، یەکێ وەرە ناین ئەڕا نووسانن و سازین تکستەێل زانستی و ئەو دووەگەێ ئامووژکاری، وە بەش خوەێ، جواوێ بدەێ وەێ گەرەکمەندییە ئەڕا چارەسەری کێشە و گیچەێلێ ک ها دە نواێ کار کوردی دە ئی سەدە ک دیرێ دیاێ.
دەێ ئەێتە لە میژوو ک ئەڕا ئیمە منێگە ملە و بنارێ تاریخیێ ئەڕا ژنەفتن دەنگمان دە دنیایێ ک پەسا وەرەو چەن‌دەنگی و فرەلایەنی دچوو ئوو ئەڕا دامەزرانن زوان و فەرهەنگێ ک خوەێ‌وەزا ببێگ و هە وەرەو نووا بچووگ نە وه‌رەو خاپووری و خاپوورەئی و مەنیسەو بیین.
دامەزراوەێ زانست همیرێ یەسە ک ئی چەن کارگرووپەێلە ک دیرێ، دە ساڵ تازە بخرنە کار. کارگرووپەێل کووکاری، ئامووژکاری، وشەسازی و بڕێ تر ک وە گەرەکمەندی دە بانان، دیارییەو دکرن.
هیواردایمن ک گشت رێزدارەێل و هازدارەێلێ ک کەڵکەڵەێ فەرهەنگ‌دووسی دیرن و گشت ئەڵیمەت و بڵیمەتەێل وڵات، بیان وەرەوپیری ئی وڵات‌چڕە ک ماڵگەێ زانست کردگە و ئی ماڵگە وە ماڵ همیر و هیوا و هاناێ خوەیان بزانن ئەڕا یە ک وەیەکا گامەێل و پەڵتافەێل گەپترێ وەرەو نوا ئەڵبگریمن و گەشەکاری بدەیمنە کار کوردی، دە سەرەتاێ سەدەێ نووی، یارمەتیمان بدەن.
گشت رووژتان نەورووز
نەورووزتان پیرووز
کامران رەحیمی
بەرپرس ماڵگەێ فەرهەنگی زانست
ئیلام، 1399 هه‌تاوی
