هونەرمەن ناودیار کورد "باکوری" دویاکووچی کرد و نێچیروان بارزانی سەرخوەشی کەێد
شەفەق نیوز/ هونەرمەن ناودیار کورد باکوری، ئمڕوو چوارشەممە لە شار هەولێر پایتەخت هەرێم کوردستان، لە تەمەن ٩٤ ساڵی، دویاکووچی کرد.
نێچیروان بارزانی سەرۆک هەرێم کوردستان پرسە و سەرەخوەشی لە مردن هونەرمەن باکوری کرد.
بارزانی لە بەیاننامەیگ سەرۆکایەتی هەرێم کوردستان بڵاوی کرد و رەسیە ئاژانس شەفەق نیوز وت: وە خەفتیگ خەوەر مردن باکوری ئەرام رەسێد، سەرەخوەشی لە گشت هونەرمەنەیل کوردستان و خانەوادە و کەسوکاری کەم، و لە خودا خوازم بخەێدەی وەر دروودی و سەبوری خیزانی بەێد.
وتیش: هونەرمەن باکوری ناویگ دیار بوی لە جەهان مۆسیقای کوردی، و وەدرویژی ساڵەیل تەمەنی خزمەت هونەر کوردی کرد، و توەنست شەپوول هونەری نوویگ دروس بکەێد، دویای دامەزانن تیپ بایجی کۆیەی هونەری و ئەوەسا کارەیل هونەریی لە هویرمان خەڵک کوردستان هەر مینێد.
هونەرمەن ئەندریۆس ئێزرائیل خەمو، ک وەناو "باکوری" ناسریاگە، لە قەزای کۆیە لە پارێزگای هەولێر لە ساڵ ١٩٢٨ لە خیزانیگ ئاشوری لەداڵگبویە، و لە شار هەولێر نیشتەجی بویە.
چیە ئەرا کەرکوک ئیجا ئەرا بەغداد لە ساڵ ١٩٥٨ تا لە ماڵ مامووستایل باڵا بەش زوان ئینگلیزی بخوەنێد، ئیجا ئەرا کار مامووستایی ئەرا قەزای کۆیە گلەو خوارد.
لە ساڵ ١٩٥٤ یەکەمین ئاهەنگ لە ئیزگەی کوردی لە بەغدا ئەنجام دا، و وە گورانیەیل فرەیگ وەناوبانگ بوی، و هەمیش لە چین مۆسیقا و گورانی و ئاواز وەناوبانگ بوی.
