هەولێر پێشانگایگ هونەری ئەرا دویەتەیل سازێد رەوش سیاسی و ئایینیان نشان دەن.. وینە
پێشانگاگە بڕیگ تابلۆی پلاستیکی لەناوی بوی، ک گوزارش لە رەوش سیاسی و ئایینی کەن، و بەشیگیان گوزارش لە باوەتەیل ژن و کۆمەڵگا کەن.
ئاڵا کەمال، ک بەشداری وە بڕیگ تابلۆ کرد، وە ئاژانس شەفەق نیوز وت: "یەکیگ لەو تابلۆەیلە ک بەشداری پێشانگاگە کردگە، لەباوەت چەن بەرمیلیگە ک شلەی سیا و سوور لەلیەو رشێد، و یەیش گوزارش لە رەوش عراق جویر وڵاتیگ نەفتی کەێد"، وتیش؛ "شلە سیاگە دەسنشان ئەو نەفتە کەێد ک رشیەێدە ناو ئەو بەرمیلەیل ئەرا نیشاندان چگنی ئەرا وڵاتەیلیگتر، لە وەختیگ شلە سوورەگە خوین گەنجەیل عراقییە و چوین مرن یا کوشیەن وەبی ئەوەگ لەی روینە سوود بگرن".
ئاڵا بەشداری وە تابلۆیگتر لە پێشانگاگە کردگە، ک لە دەسبەنیگ (کەلەپجە) ها ناوی، و وە قەڵەم و کتاو و تەلەفۆن و چوقوویگ پیچیاگە، هونەرمەنەگە لەباوەت ئی تابلۆ ئویشێد: "نیشاندان رەوش ئازادی هویروڕا، جویر ئەو دەسبەنە لە دەور دەربڕین قەڵەم ئەرا سنووردارکردن نویسین و نویسەرەیل."، لە وەختیگ سنووردارکردن دەورگرد تەلەفۆن گوزارش لەو سنووردارکردنە کەن ک ئەرا بڵاوکردن و دەربڕین دانریانە، و یەیش گشت توخمەیل ناو تابلۆگە و سنووردارکردنە لە رەوش عراق.
لە وەڵام پرسیاریگ لەباوەت هوکار هەڵوژاردن ئەو تابلۆیلە ک رەنگدانەوەی رەوش سیاسیین، ئاڵا لە وەڵامەگەی وت: ئی باوەتە چوودەو ئەرا کاریگەری ئی رەوشە لەبان گشت تاکە کەسیگ لەناو کۆمەڵگا، چ پیاو بوود یا ژن.
لای خوەییش، خەدیجە سەلیم ئەرا ئاژانس شەفەق نیوز وت: وە تابلۆیگ بەشداری پێشانگاگە کردگە ک دەسڕیگە و بڕیگ تەسپیح وەپیەو پیچیانە ک "ئی تابلۆ گوزارش لە ئایین کەێد، ک بڕیگ کەس شیوانیە، و ئەو تەسپیحەیل رەنگاوڕەنگە گوزارش لە ئایین کەن، و ک لە بنەڕەتەو رەنگینە و چوین خەڵک شیوەگەی بەدەو کەن، و ئەو میرگەیل شکیاگە لەبن دەسڕەگە، ئەرا نشاندان ئی شیواننە هاتیە."
پەیامنێر ئاژانس شەفەق نیوز باس کرد ک بیجگە ئەو تابلۆیەیلە ک گوزارش لە رەوش سیاسی و ئاینی کەن، پێشانگاگە چەن تابلۆیگتر گرێدە خوەی ک گوزارش لە پرسەیل ژن و جگارەکیشان و زیانەیلی ئەرا تاک و مناڵیش کەێد.
پەیامنێرمان وتیش؛ بڕیارە پێشانگاگە تا ١٨ی ئایار وەردەوام بوود.
