نەجوا فوئاد سەماکەر میسری لەبان جی بیماری هاوار لەدەس بیکەسی کەێد
ئەو خانمە هونەرمەن ناودیارە لەبان جی بیماری لە چەوپیکەفتنیگ وەگەرد خانمە راگەیانکار میسری سوهێر جۆدە باس ژان و زیان خوەی کرد.
لەناو قسەیلی وت: تەنیا خانمە هونەرمەنەیل نەبیلە عوبێد و سەفیە عومەری هەواڵی پرسن، دی کەسەیگ ترەک لە ئەسارەیل هونەری پەیوەندی وەردی نیەکەێد.
تەمەن وەبیخود گوما بوی
نەجوا فوئاد وە دەنگ خەفەت و تویڕە وت: هونەرمەن هویچیگ ئەرای نییە، یە چشت گەنیگە، کە کەسیگ تەمەن خوەی وەپەتی گوما کرد، و دووپات کرد کە هەناێ داوای مووچە کرد وەپی وتنە ٦٠٠ جنێه میسری بەێد، کە یەیش وەپیان وتیە: یە خو دەمەی دەس پاسەوان دەر ماڵەگە.
نەجوا فوئاد داوای بەزەیی وە هونەرمەنە گەورەیل کرد، کە بایەسە بزانن پویلیگ وەدەسیان نەکفتیە، و هونەرمەنەیل ئیسە مەلیۆنا وەدەسیان کەفێد.
دیاری کرد کە گەورە ئەسارەیل هونەر وەلاتی مردن، ئەرا نموونە فەرید شەوقی و روشدی ئەبازە، و هەمیش مەدیحە کامل کە مەکینەی دویرانن بویە بەشی، تا لەبانی کار بکەێد و تیکە نانیگ ئەرا خیزانەگەی درارێد، وتیش: تەنیا هند روستەم کار خاسیگ کرد، ئەرا خوەی شوی کردە پزشکیگ وبویە خاوەن ماڵ و مناڵ.
خیانەتیگ لە خانمیگ نزیک لە خوەی
نەجوا فوئاد لەناو قسەیلی وتیش: ژنیگ فرە نزیک لە خوەی، کە ناوی ئاشکرا نەکرد، کەفتە نزیک شویەگەی و هیشتەی واز لە نەجوا فوئاد بارێد و ئەو بخوازێد.
ئەو خانمە هونەرمەن میسریە دووپات کرد کە گەردنی ئازاد کردیە، وتیش؛ لەناو سویرەگەی سەما کردم، منیش نیەزانم یە سویر شویەگەم بویە، کە ئەو مەوقە هەکاتی کەمووتەر سەربڕیاگ بویمە.
سەرچاوە: ئەلعەرەبیە
