مردن خانمە هونەرمەنیگ ئەمریکی ناودیار دویای رویداویگ هاتوچو
شەفەق نیوز/ لە کالیفۆرنیا، ئمڕوو شەممە، مردن خانمە ئەکتەر ئەمریکی "ئان هیش" راگەیانن، ئەوەیش دویای یەک هەفتە لە خەفتنی لە خەسەخانە، لەوەر رویداویگ هاتوچو لە لۆس ئەنجلس وەسەری هات.
هۆلی بێرد قسەکەر وەناو ئەکتەرەگە، ئەرا ئاژانس فرانس پرس وت: ئان هیش، دویای پەککەفتن کارەیل مەغزی وە تەواوی، وە فەرمی مردنی راگەنیێد، وەگورەی یاسای ویلایەت کالیفۆرنیا، وتیش دڵی وە ئامێر کار کەێد، تا پەخشین ئەندامدیل لەشی ئاسان بوود.
لەلای خوەییش، بنەماڵەی هیش لە بەیاننامیگ هاوبەش وتن: ئمڕوو رووشناییگ وگیان نازاریگ و خوەشهاڵیگ و داڵگ دووسیگ و هاوڕی دڵسووزیگ لەدەس دایمن.
هومەر لافون کوڕ هیش لە بەیاننامیگ جیا وت: من و ئەتلاس برام، داڵگمان لەدەس دایمن، ئومید خوازم لەو زیانیە ئازاد بویە.
هیش، لە تەمەن ٥٣ ساڵان، دویای زەخمەیل سەختیگ لە سەری، لەو رویداو هاتوچوە، لە پەنج ئاب، کەفتە بیهووشی.
هیش لە شمارەی فرەیگ لە فیلمەیل نەوتەیل سەدەی گوزەشتە بەشدار بوی، جویر "٦دیاز، ٧ نایتس" و "دۆنی براسکۆ" و لە بەشداریکردنی لە فیلم "ئەنەدەر وورد" خەڵات "دەی تایم ئیمی" لە ساڵ ١٩٩١ وەرگرد.
هیش وە ماشینەگەی دالە ماڵیگ دوو قاتی لە گەڕەک مار فیستا، ک ئاگر گەورەیگ لەلی بویەو.
