یەکەمین رومان کوردی ئیلامی
شەفەق نیوز/ لەلایەن ئەنجومەن فەرهەنگی زانست، یەکەمین رومان وە زاراوەی فەیلی، ئەرا خانمە نۊسەر زەهرا ئومیدی، وەناونشان (هووز مڵاکەت) دەرچگە.
ئی رومانە ک وەرجە چەن ساڵیگ چاپ کریاس، نموونەیگ دەوڵەمەنیە ئەرا زوان کوردی وەگشتی، و زاراوەی فەیلی وەتایبەت، ک خانمیگ لە شار ئیلام فەیلی، ئەرا نەتەوەی کورد پیشکەشی کردگە.
«ڕە‌یس پاسگا باوە‌ڕ نیەکە‌ێ مڵاکەت بتۊە‌نێ ئاێە‌م بکوشێ...» یە یەکەم ڕستە‌ێ ڕومان هووز مڵاکە‌تە. یەکمین ڕومان کوردی ئیلامی.
زه‌هرا ئومیدی - ئەندام زانست
هووز مڵاکەت ساڵ ۱۳۹۸ ده لایەن نەشر باشور بڵاو بۊ. ئێ ڕومانە باس مەردم چگاپە‌ل کەێ ک جی خێاڵیێگە. رومان وە شیوەی تاکەکەسییە و لە زوان یەکم کاراکتر ک زاڕووێگە مە‌ردمەێل زۊباوڕێ نیشان ده‌ێ ک کە‌فنە شۊن کۊخاێ چاچووڵە‌بازێگ.
ئومیدی لە زوان زاڕوو باوه‌قوورە‌تێ نە‌قڵ نە‌زانی و ئە‌سیر بۊن وڵات دە قە‌پاڵ خورافە کەێ و نیشان دە‌ێ خورافە چە وە سە‌ر مه‌ردمان نیشته‌جی چگاپە‌ل دیارێ.
هاوردن ڕە‌سم و شێوە‌ێ ژیان مەردم و تە‌سویرسازیە‌یل خوەمانی دە نیشانە‌یل هووز مڵاکە‌تە. ڕومان تۊە‌نێ وە زوان دیاری ناوچەێگ بنۊسیه‌ێگ و فە‌رهە‌نگ ئە‌و خاکە ده نامێ بوو و دە هە‌ر جی دنیایش بخوە‌نیه‌ێد و گشتێ ده‌ێ ئەوبڕەسن. ئومیدی هە ئە‌و جوورە ک باێە‌د لە زوان کوردی خوارین ئەرا شیوە داێن وە خێاڵ و ڕومان سوود کردگە.
هووز مڵاکەت سۊکێ لە فە‌رهە‌نگ ئیلام خە‌ێدە دە‌ر ک تۊە‌نێ ئەرا گشت دنیا ئوو گشت وەردەنگەێل دڵبقرچ بوو. جی فروش: کتاو فروشی هامون، لە لاێ پارک کودک یا شار کتاو ئیلام.
