هه‌فتمین فستیواڵ فیلم کوردی ده یووتوبووری
شه‌فه‌ق نیوز/ ده یووتوبووری (گووتنبرگ Gotenborg) وه سه‌ره‌وه‌ره‌کاری دڵشاد ئه‌حمه‌د، به‌رپرس ئه‌نجومه‌ن هونهرهجوانهکان یووتوبووری، ئوو وه هام‌به‌شه بیین بڕێ له فیلمسازه‌یل کورد ده ئورووپا، عراق، ئێران و قه‌یرێ له فیلمسازه‌یل فڵه‌یتی و بغه‌یران کورد، ده رووژه‌یل بیس و هه‌فت، بیس و هه‌شت، بیس و نۆ نوامبر 2020 ئوو وه شێوه‌ی ئانلاین دنرێ.
ده ئی جه‌رخه‌ی هونه‌رییه، چه‌ن دانیشتنه‌وه‌ی ته‌خه‌سوسییش دنرێ ک ده یه‌کم رووژه‌گه، باس ده مل ده‌رس خوه‌نستن و سه‌رڕێشته گرتن ده‌رهێنه‌ری سینه‌ما ده هه‌رێم کوردستان دکرێ و قسه‌قوڔات ئی ئائینه‌ش دڵشاد مسته‌فا، ماموستای زانکۆ ده ئنگلیس و هه‌ریمه وه‌رد هاوڕێ مسته‌فا ده‌رهێنه‌ر کورد فنلاندی، ئمجا دو کورته‌فیلم، ئه‌وه‌ڵیه‌که (گراژ) هن (یاد دن) ئو (دۆما وێنه‌گه) هن (مه‌ریوان ئبراهیم) له هه‌رێم، ئمگل فیلم (تارا) له (فاتمه ده‌ستمه‌رد) له ئێران، ئمداڵ فیلم (جاودان/ هه‌رمان) کار (مه‌هدی جۆده‌ت/ ئاسو) له هه‌رێم نیشان ددرن.
ده سه‌ر ئێواره‌ی دوێیم رووژه‌گه، دانیشتنه‌وه‌گه ده بان (شوون و نوون و وه‌رچاوگری فستیواڵه‌یل فیلم و رووداوه‌یل هونه‌ری ده هه‌رێم کوردستان)ه ک مێوانه‌گه‌ێ (دائر عومه‌ر فارس)ه، به‌رپرس هونه‌ری فستیواڶ شار سڵێمانی کوردستان.
ئه دۆمای ئه‌وه فیلم کوڵێ وه نام (ماڵێ چووڵ) له (هه‌وراز موحه‌مه‌د) له هه‌رێم، ئمجا کورته‌فیلم (روزا) له (موحه‌مه‌د فریا) ئیکه کوڵه‌فیلم (رووژنامه‌وان) هن (فاتمه ئه‌حمه‌د) و (مێهران مه‌جدوو) له هه‌رێم و ده‌س‌دۆماجاریش فیلم (هاوار و هانای که‌په‌رنشین) هن (سرۆشت عه‌به‌ڕه‌ش) دخرنه وه‌ر چه‌م.
ده دۆمانیمه‌ڕووه‌ی دۆمارووژه‌گه‌یش، دٱنیشتنه‌وه‌گه کریاگه له‌به‌د (گرینگایه‌تی و ئاڵنگ و ته‌ئسیر ناین فیلم موسته‌نه‌د) ک (سالار سه‌عید) کارناس سینه‌ما و ماموستای هونهرهجوانهکان ده شار سڵێمانی وه‌گه‌رد (عومه‌ر موحه‌مه‌د) سه‌رنویسه‌ران رووژنامه‌ی ئه‌نفاڵستان، قسه‌کاره‌یل ئی دانیشتنه‌وه‌ن.
کورته‌فیلم (کاوش گه‌رم) هن (عه‌دنان عوسمان)، (ده‌سه ژیه/ ده‌سه‌کوته/ Touch) هن (وه‌رمان سه‌عید) و کوڵه‌فیلم (ئاڵتینه پیاگ/ پیاگێ هشک زێڕ و تڵا) هن (مه‌ریوان ئبراهیم) ده ئی تاقه ده‌رارنه ده‌ر.
