پیشانگای شیوەکاری لە هەولێر وە بوونەی رووژ ژینگە

پیشانگای شیوەکاری لە هەولێر وە بوونەی رووژ ژینگە
2023-06-05T11:04:56+00:00
شەفەق نیوز/ لە شار هەولێر پایتەخت هەرێم کوردستان، ئمڕوو دووشەممە، پیشانگایگ شیوەکاری وەەبوونەی رووژ جەهانی ژینگە سازیا.

پەیامنێر ئاژانس شەفەق نیوز وت: لەناو پێشانگاگە بڕیگ تابلۆ نمایش کریا ک ژینگە و دیمەن سرووشت لە هەرێم کوردستان نشان دەن.

دیاری کرد ک شمارەیگ لە هونەرمەنەیل شیوەکاری و رووشنهویرەیل ئامادەی پیشانگاگە بوین، وەگەرد لایەنەیلیگ حکومەتی پەیوەندیدار وە باوەت ژینگە.

هونەرمەن رەزوان قادر ک لە پیشانگاگە بەشداری کرد، ئەرا ئاژانس شەفەق نیوز وت: ئی پیشانگا ٣٥ تابلۆ وەخوەی گرێد ئەرا دیمەنەیل سرووشتی لە گشت ناوچەیل هەرێم کوردستان، ئەوەیش وە بوونەی رووژ جەهانی ژینگە.

دیاری کرد ک ئامانج لە سازین ئی پیشانگا هووشدارکردن کۆمەڵگاس وە گرنگی مقیەتیکردن ژینگە و زیایکردن رووبەرە سەوزەیل، وەگەرد ناسانن رخ ئاڵشتبوین کەشوهەوا و خەسەوکردن تەقەلا ئەرا کەمەوکردن کاریگەری بەدی لەبان ژینگە.

 

Shafaq Live
Shafaq Live