رەوانگە هۊردەکارەیل ئاهەنگ خەڵات ساڵانەی راگەینێد و رێز لە شەفەق نیوز نەێد
شەفەق نیوز/ دامەزراو رەوانگە، راگەیان سازین ئاهەنگ ساڵانەی ئەرا خەڵاتەیل داهێنان لە مانگ تەشرین دۊەم لەی ساڵە لە بەغداد پایتەخت.
"خەڵاتەیل رەوانگە" هەڵمەتیگە ساڵانە ئەرا بەهرەی گەنجەیل لە چینەیل جۊراجور، هەرلە کاروبار و تەکنەلۆژیا تا هونەر وئەدەب، ک گەنجەیلە پڕۆژەیلیان دەنە دەسەیلە لە گشت چینەیلە، و دۊای هۊردبینی خاسترین سێ پڕۆژە پەسەن کریەێد، ئیجا ئاشکرای سەرکەفگەیل وە سازین ئاهەنگیگ کریەێد.
وەڕیەوبەر دامەزراوەگە عەبدولسەلام مەدەنی لە وتاریگ وت: دامەزراو رەوانگە لەبان نەوەی گورج کار کەێد، و هەڵمەتەگە گرنگی وە گەنجیل و بەهرەیان ودووارە پەیاکردن خودیان دەێد. پڕۆژەی خەڵاتەیل رەوانگە وەفەرمی لە ساڵ ٢٠١٤ دەسوەپی کرد، و لەو مەوقەو رسوومەیل کۆتایی لە شارەیل هەولێر و سلێمانی و دهۆک سازیاد.
لە ساڵ ٢٠٢١، پڕۆژەی خەڵاتەیل رەوانگە فراوانەو کریا، تا گشت شۊنەیل عراق بگرێدەو، و رسوومەیل کۆتایی لە شانۆی وەتەنی لە بەغداد پایتەخت ئەنجام دریا.
دامەزراوەگە لە راگەیانن بەڕنامەی ساڵ ٢٠٢٢ رێز لە ئاژانس شەفەق نیوز نا ک خوەی چەودێریکەر راگەیانن ئاهەنگ ٢٠٢١ بۊ.
لەلای خوەییش، سامان عەبدولڕەحمان عومەر وەڕیەوبەر بەڕنامەیل دامەزارەگە وت: دامەزراو رەوانگە کار ئەو گەنجەیلە وەگرێد ک تەمەنیان هالە ناونی ١٥-٢٥ ساڵان لە دانیشتگەیل عراق، ئەوەیش لە چینەیل: کوڵە چیرۆک (زوان عەرەبی)، کوڵە چیرۆک (زوان کوردی)، کوڵەفیلم، وینەگردن فۆتۆگرافی، میوزیک ژەنین، داهێنان زانستی، هونەر دووارە وەکارهاوردن، شیوەکاری، کاروبار، شعر عەرەبی، شعر کوردی، پرۆگرام.
و دیاری کرد ک خشتەی ماوەی وەرگردن پڕۆژەگە هالە ناونی ٧ ئادار تا ١٥ی تەمموز ٢٠٢٢، و لە ١٥ی ئاب تا ١ تەشرین یەکەم.
وتیش: رسوومەیل کۆتایی ئەرا ئاشکراکردن سەرکەفتگەیل لە خەڵات ئاست یەکەم و دۊەم ئەرا هەر چینیگ لە ئاهەنگ مانگ تەشرین دۊەم ساڵ ٢٠٢٢ سازیەێد.
ئەو گەنجەیل خاوەن داهێنانە تۊنن کارەیلیان وەڕی لیست ئەلیکترۆنی پڕۆژەگە بیەنە دەس، لەبان ماڵپەڕ ئەلیکترۆنی www.rwanga.org/awards یا بیەنەی دەس یەکیگ لە نۊسینگەیل دامەزراو رەوانگە.
