جەژنوارەی فیرووزەی ئیلام، تەمام بی
شەفەق نیوز- دە ئیلام، جەژنوارەیێگ وە نام فیرووزەی ئیلام، ئەونریا.
ئی جەژنوارە ک ماڵگەێ (شاکار عەسر)، وە بەرپرسی خانم دیبا روستەم‌پوور، نایەێ ئەڕا نیشان داین دەسکارەێل هونەری ئیلامییەێل ئەونریا.
دە دۆماخر ئی جەژنوارە، داوەرەێله‌ێ بەرنامە‌گه وەێجوورە بڕیار دان:
-جووراوجووری دەسکارەێل هونەر کوردیاتی ک پڕن لە نووخوازی، ئەر ئێوەت بکرن دتوانن ک دە دنیا ببنە خاون دەنگێگ تر ئەڕا خوەیان و بازاڕێ ئێرانی، ناوچەئی و نام‌دەوڵەتانی بکەنە دی.
-ناسین هونەرەێل گەوروێنە و سوننەتی، دبێگە چین خەیرێ ک پێشتەوانی لە نووخوازی دە هونەر کوردیاتی بکرێ ک یە خوەێیش یەکێ لە چشته‌ێلێ بییە ک جەرخه‌ێ داوەرەێلە گرتگەسەێ وەر چەم.
-ناسین و ناسانن هونەرمەندەێل نەناسریاگ ک وە پێشتەوانی دەوڵەت دیاێگە دەس، خاسە ک بگیردرێگە وەر چەم.
-بایەد ئەڕا رەونەق داین وە سازین دەسکارەێلە، بایەد دوارە هە ئەرزیابی بکرێ لە دەسکارەێل و کارەێل فەرهەنگی ئوو یە ک چەنێ دهەرزن بخرێگە وەر چەم.
-ئەڕا یە ک گشتێ ویر بکەن وە ژینگە پارێزی بایەد وەر ئەو سازین ده‌سکارەێل و کارەێل فەرهەنگی ک لە کارەێل وەردەسی و کوانە و فڕدریاگ دوروس دبن بچیمن بەشکەم هونەرمەندەێلەیش وە بەش خوه‌یان، کارێ بکەن ک موحیت ژیان دەروەس‌ترەو نەکرێگ.
-ئەڕا یە ک دە نواێ چشتێ وە نام هەڵمەت فەرهەنگی ڕابوسیمن خاسە ک لە دەسکارەێل و هونەرەێل ناوچەێ زاگڕوس، رێزداری بکرێگ.
-خووە ک ئەڕا هونەرمەندەێلە چەپڵە بکوترێ و رێزێیان بگیردرێ جوورێ ک هونەر بکەنە چشتێ ئەڕا دەرئامەێ دەرهاوردن و زنەیی خوەیان.
-ناسانن دەسکارەێل ئیلامی دە تلیفزیان و دەنگ و رەنگ ئێران کارێگە ک وە بایسە.
- ناین نمایێشتگاێل و بەشداری کردن دە نمایێشتگاێل دەرەوەێ ناوچەێ زاگڕوس و ئوستان ئیلام، ئەڕا یە ک هونەرمەندەێلە لە تەجروبەێلەێ یەکترەکی ئەوڕەسن، فرە وەگەرەک دیاێ.
-خاسە ک کارێ بکرێ تا هماڵدارەکی خاسێ بکەفێگە نام‌بەین هونەرمەنده‌ێلە وە هەر چین و ساڵێ ک دیرن و دە هەر شارستان و ئاوایێ ک دانیشن.
وەداخەوە چوون دنیا هێمان وە سەقامداری دە ئەوناین جەژنوارە و داوەرییەێل ئانلاین و مەجازی نەڕەسییە‌سەو ئەڕا یە دە ئی دەورە، هەست کەمترێ وەرد کارەێلە گیریا ئوو چشتێ ک فرە دیاری بی یە بی ک هونەرمەندەێلە خوەیان ئەو رزگ‌بەندییە ک ئەڕا فرووشتن کارەێلە دە دنیا وەگەرەکە نەگرت‌بینە وەر چاوێیان.
داوەرەێلەێ ئی جه‌ژنوارە کامران رەحیمی، لەیلی رەشنەوادی ئوو حەمیدڕزا بەختیاری بین.
