بوو خاک لە گەرمیان.. پێشانگایگ ئەرا هونەرمەن کورد جەهانی دڵشاد
شەفەق نیوز/ ئمڕوو پەنجشەممە، پێشانگای شیوەکاری ئەرا هونەرمەن کورد و جەهانی دڵشاد کۆیستانی لە هۆڵ وەڕێەوبەرایەتی روشنهۊری و هونەر لە گەرمیان واز کریا، و تا دوو رووژ وەردەوامە.
پێشانگاگە وەناونشان "بوو خاک " بۊی، و نزیکەی ٢٠ تابلۆی شیوەکاری لەناوی بۊی، ک باس پەیوەنی هاووڵاتی کورد وەگەرد نیشتمانی و دووسیی ئەرا خاک کوردستان کەن.
ئازاد حسێن فەرحان وەڕیەوبەر گشتی روشنهۊری و هونەر لە گەرمیان ئەرا ئاژانس شەفەق نیوز وت " پێشانگاگە تا دوو رووژ وەردەوامە، و لەناو هۆڵ وەڕێەوبەرایەتی گشتی روشنهۊری و هونەر لە گەرمیان واز کریا، وە ئامادەبۊین سەرپەرشتیار ئیدارەی گەرمیان جەلال شێخ نوری و وەڕیەوبەرەیل گشتی و بڕێ لە هونەرمەن و روشنهۊریەیل لە ناوچەی گەرمیان.
ئازاد وتیش: پێشانگاگە زیایکردنیگ هونەریە ئەرا روشنهۊری و هونەری شار گەرمیان ک جۊلەی هونەری لەناوی زیایەو بۊی، ئەوەیش وە پشتگیریکردن حکومەت هەرێم کوردستان.
ئازاد دووپات کرد ک وەڕێەوبەرایەتی گشتی روشنهۊری و هونەر لە گەرمیان هەر وەردەوام بوود لە هاوەدن هونەرمەنەیل جەهانی ئەرا شار گەرمیان و ناوچەیلی، تا سوود لە ئەزموونیان بگرێد لە گەشەکردن جۊلەی روشنهۊری و هونەری لە ناوچەگە.
دڵشاد کۆیستانی هونەرمەنیگە ناسنامەی فەرنسی دیرێد و لە بنچینە کوردە، هالە جۊراجۊر کارەیل هونەری، لە گورانی و شعر و شیوەکاری و ئەکتەری، و هەنای رەسیە ئەوروپا گرنگی دادە شیوەکاری، و ناوی لە چەن پێشانگای تایبەت لەناوڕاس شار شومونت فەرنسی دەرکەفر، و دەیان پێشانگای تایبەتی کرد، و لەناو زیاتر لە ٢٠ دەوڵەت چالاکی هونەری ئەنجا داگە، و یە نۆزدەهەم پێشانگایە.
