وازکردن قاوەخانەیگ کەلتوری لە شار خانەقین

 وازکردن قاوەخانەیگ کەلتوری لە شار خانەقین
2022-07-25T16:03:17+00:00

شەفەق نیوز/ لە ژیر دروشم (ماڵیگە ئەرا گشتمان)، ئیوارەی ئمڕوو دووشەممە،  قاوەخانەیگ کەلتوری لە شار خانەقین واز کریا. 

(میلکان) ناونشان ئەو قاوەخانەس ک ئیوارەی ئمڕوو،  وەئامادەبوین قایمقام خانەقین،  و بڕیگ لە روشنهۊر ونویسەر وهونەرمەنەیل شارەگە، بڕیگیش لە شار کەلار ودووسەیل ئەدەب و هونەری، ئەو قاوەخانەی کەلتوریە واز کریا، ک وەدەس نویسەر خانەقینی (ئیبراهیم باجڵان) پەردەی تابلۆگەی لاوریا. 

  وەگەرد وازکردن قاوەخانەگە، دویای وتار قایمقام خانەقین، و بڕیگ لە کەسایەتیەیل شارەگە، کۆڕیگ شعر وە سەرپەرشتی وەڕێەوبەرایەتی روشنهۊری و هونەر/کوردستان لە خانەقین، ئەرا شاعر کەنعان موڕاد کریا، ک شعرەیلی وە زوان کوردی/ فەیلی و وەزوان عەرەبی ئەرا ئامادەبویەیل پیشکەش کرد. 

جی باسە، ک یەکەم قاوەخانەی کلتوری لەلایەن کەنعان موڕاد لە ساڵ ٢٠١٧ لە شار خانەقین واز کریا، ک وەناو ئەدیب خانەقین ڕەحمەتی (عەبدولمەجید لوتفی) بوی، وەلێ لەوەر پەتای کۆڕۆنا و کەرەنتین گشتی، ناچار بوی بوەسێدەی، و ئیرنگە رووژنامەنویس ئەمیر خانەقینی، دووارە قاوەخانەگە واز کرد، دویای خەرج وەئەرک نووەوکردنی، و ئاڵشتکردن ناوەگەی ئەرا (میلکان). 

Shafaq Live
Shafaq Live