وە رەفتاریگ زیرەک.. مناڵیگ ئەمریکی خوەی لە رفیان قورتار کەێد
شەفەق نیوز/ ژنیگ ئەمریکی، کەفتە شوین کوڕیگ لە تەمەن ١٠ ساڵان تا بڕفنێدەی، هەنای ئەو کوڕە لە مەکتەو دەرچگ وە وەرەو ماڵ خوەی چی.
وەگورەی رووژنامەی دەیلی مەیل بەریتانی، سامی گرین فیرخوازە لە پۆل چوارەم، خەڵک بوتستاونە لە ویلایەت بەنسلفانیا، لە ری وەرەو ماڵ چیاد، دویای دەرچینی لە مەکتەو، ژنیگ خوازیە تەما بخەێدە نوای، و وەپی وتیە خوازم خوەراک ئەراد بسینم، و وتیە: من ئەرا "واوا" چم، خوەشد تیەێد بچیدە "واوا" ئیجا لەلی پرسیە؛ ئایا خانەوادەی توو هانە کوو؟.
سامی دیاری کرد، ک زانستیە چشتیگ ناڕێک هەس، و هەس وە نائارمی کردیە، وت: رخم چیە و لەرزیمە، ئەراوە هویر وە چشتیگ کردمە.
لەو مەوقە قسەی باوگی کەفتیەسە یادی، هەنای تەمەی کردیە ک ئەگەر هەس کردێ کەسیگ کەفتیەسە شویند، بڕوا وەپی نەکە، و ڕەفتار ئاسایی بکە، ئیجا پەنا وە کەسیگ گەورە لەو ناوە بووە.
سامی چیەسە ناو دوکان "دانی بی فانکی" و لە گووش دویەتە کاشێرەگە (هانا دانیلز لەتەمەن ٢٧ ساڵان) وتیە: ئەو ژنە لە دەیشت کەفتیەسە شوینم، و خوازم لەنوای خوەد بکەێدە داڵگم.
کامیرایل چەودیاری نشان ژنیگ دەن وەگەرد سامی لە کنار جادەگە ری کەێد، ئیجا سامی چوودە ناو دوکانەکە.
دویەتە کاشێرەگە وەزوی جویلە کرد، و کەفتە ناوبەین سامی و ژنەگە، و ژنەگەیش چیە ری، و هانا دەرەگە وەزوی بەسا.
دویای ئەوە، پولیس ناوچەگە ناونشان ژنەگە دیاری کرد، و هەواڵەی تەندروسی دەروینی کریا.
