وڵات چین ماشین نوو چێری خەێدە بازاڕ

شەفەق نیوز/ کۆمپانیای چێری ک وە یەکیگ لە گەورەترین کۆمپانیا چینییەیلە دانریەێد، ئەرا دروسکردن ماشین، جۊر نوویگ ماشینەیلی خەێدە بازاڕ، ک رکابەری ماشینەیل جەهانی کەێد، تایبەت ئەوانەگ وە شیواز کروس دروس کریەن. 

ماشینەگە هاوشیوەی تیگۆ هەشتە ک ساڵ گوزەشتە چێری بڵاویکرد، باوجی چەن ئاڵشتکردنیگ لەناوی ئەنجام دریاگە،  تایبەت لە شیوەی دەیشتی و چراخەیلی ک کریانەسە  ئێڵ ئی دی. 

درۊژی ماشینەگەی چێری چوار مەتر و(74) سانتیمەترە، پانییەگەی (186) سانتیمەترە، و ناوبەین پاچگەیل وەردەم و دۊای دوو مەتر و (71) سانتیمەترە. 

لەرۊ تەکنیکیی  دروس کریاگە تا بوودە یەکیگ لە پیشکەفتگەیل لە جەهان، دوو شاشەی تاچ گەورە دیرێد و رۊ وەردەم رانندە هۊچ دوگمەیگ لەلی نییە، بیجگە ئەوانەگ هانە سوکانەگەی.

قەمارەی ماشینەگە و کوشنەیلی سیستم سەرد و گەرمی هاناوی، هەمیش و هاز(197) ئەسپ و (254) ئەسپ هاوەردەس.