هشکانن سه‌ر‌چاوه‌ی ئاوه‌یل عراق، چشتێ ک له ویر‌ه‌و چگه

هشکانن سه‌ر‌چاوه‌ی ئاوه‌یل عراق، چشتێ ک له ویر‌ه‌و چگه
2020-09-10T11:48:50+00:00
شەفەق نیوز/ خووه بزانن ک بڕێ له‌ی پروژه‌یله بێ‌هیرده‌و بیین ئه‌ڵه ئاڵنگ و ئه‌سه‌رێ ک ده‌ی لای سنوور (ئیران) ده مل خه‌ڵک عراق دنن، تاریف کریانه.
ئیجوور کیشه‌یلێ ده چوارپاڵ کشوه‌ر ئێران بییه‌سه ده‌سپێچگانێ ئه‌ڕا هه‌ڕه‌کیشه‌کی ده نامه‌ین ئێران و ئه‌و دۊه‌ی هامسایله‌گه‌ی. ئه‌ڵوه‌ت ده‌وڵه‌ته‌یل هامسای ئێرانیش وه‌یجووره رمیژییه‌یلێ دکه‌ن.
یه‌کێ له‌ی چشته‌یله، پروژه‌ی گه‌ورای ئاویاری گه‌رمه‌سێر رووژئاوای ئێرانه ک ئاڵنگێ هشکانن سه‌رچه‌مه‌ی فره له گڵاڵه‌یل و دارسانه‌یل و زه‌لگئاوه‌یل و گوڵه‌مه‌یل و کیه‌نیئاوه‌یل و کێشت‌وکاڵ و باخداری هووزه‌یل عراقی ده ئوستانه‌یل واست و دیالییه ک فره‌تر دانیشتگەیلەی کورده‌یل فه‌یلیێگن ک قام‌وکاره‌یل کورده‌یل فه‌یلی ئه‌و ده‌س سنوورن.
وه‌گه‌ره‌گه په‌یوه‌نی ده نامه‌ین ده‌وڵه‌ته‌یل و پارلمانه‌یل ئێران و عراق بگیردرێ تا هه‌قئاوه‌ی هووزه‌یل عراقی ده ئی‌لای سنوور ئیرانیش وه تاڵان نه‌چوو.
تورکیه ده لاژۆر عراقیش وه سه‌د و کاناڵسازی هه ئی دۊزه‌مه ئه‌ڕا هه‌ریم کوردسان و مووسڵ و کوردستان رووژئاوا ده سووریه ساز کردگه.
ئه‌گه‌ر ئی رێ و ره‌‌وه‌نه‌یله هە لەی‌وا دریژه داشتووبێ، بێ‌شک له عراق ک گافاره‌ی ژیار و ته‌مه‌دون ده دنیا بییه و وه دڵ ناودوئاوان نام ده‌ر کردگه، بێ ژه قه‌واخه‌ی جوور بیاوانێ هشک‌ ئه‌ڵاتگ چشتێ تر نه‌دمینێ و ده بانان، مه‌گه‌ر هه وه واته بویشن ناودوئاوانێ بۊ و نه‌بۊ. ئمجا بێ‌ژه میژووێ نادیار و تاریخێ باوڕ نه‌کردنێ هیچ چشتێ تر له‌ی ده ویر و بۊڕگ وڵات نه‌دمینێ.
ئی ئاخر وه شه‌ڕییه ئه‌ڕا عراق، گرد ناوچه‌ی خاوه‌رمیانه تۊش شه‌ڕ و نهات و نه‌هامه‌ت و نه‌دامه‌ت دیارێ، چۊنه ک که‌م‌و‌کورتێ یه‌مه‌یش هاوردگه و دبینیمن ک رێزگه‌رته‌یل و ته‌م و تووزێ ک ئاڵنگ هشکانن هووره‌یل لاخوار عراق و ئێران بڕین دارسانه‌یل خورمای لاخوار عراق و خانە‌قین و کووتە، دامان ئێرانیش گرتگه و ته‌م و تووز ئی کاره وه چه‌م تێهرانییه‌ییش چگه و خاک خەم رشانگەسە مل سەر رووژئاوا و کە‌م‌و‌کوتێ نامڕاس ئێرانیش. ئی چشت فرە فرە گرینگە، لە دوارە بایسە بگیردرێگە وە‌ر چە‌م گشت.
Shafaq Live
Shafaq Live