ناسا وەهیزترین مووشەک ئەرا بان مانگ وەشێند

شەفەق نیوز/ مووشەک نوویگ لەلایەن ئاژانس "ناسا" لە یەکەم رویکردنی وەرەو مانگ وەشیا، و سێ وەیلکان هاناوی، ئەوەیش لە وەخت زوییگ شەوەکی چوارشەممە، ک وەهیزترین مووشەک لە جەهان "SLS"، ئەرا یەکەمین جاری لە فلۆریدا وەشیا، لە سەرەتای ئەرک "ئەرتیمیس" لە گلەوخواردن ئەمریکا وەرەو بان مانگ.

وەیەوە ئەمریکا گام گەورەیگ وەرەو دووارە کلکردن  ئەرا بان مانگ گلەو خوەێد، ئەرا یەکەمین جارە لە وەخت کۆتایی بەرنامەی "ئەپۆڵۆ" وەرجە ٥٠ ساڵ.

کلکردن تیمەیل بانان

ئەگەر کارەگە وەگورەی پلانەگە ری بکەێد لەی کاروان گرنگە "ئەرتیمیس ١" ک سێ هەفتە وەپی چوود، ئەوەسا مووشەکگە کەپسول چووڵیگ وەرەو بازنەی پانیگ لە دەورگرد مانگ کل کەێد، ئیجا کەپسولەگە ئەرا زەوی گلەو خوەێد و لە زەریای ئارام لە کانوون یەکەم ئایندە نیشێدەو.

لەی کاروان تاقەییە، کەپسوول ئۆردۆن چووڵ نیەنیشێدە بان مانگ، باوجی وە ٦٤ هەزار کیلومەتر لەلی نزیکەو بوود، لە شمارەیگ پەیمانەیی ئەرا کەشتییگ چووڵ لە ئایەم، و ئەرک ئەرتیمیس ١ ک مەزەنە کریاگە ٢٥ رووژ وەردەوام بوود، ئامانجی ئەوەسە ک بزانیەێد ئی کەشتی نووە ئەرا بردن تیمەیل لە بانان گونجیاگە.

سێیەم تەقەلای وەشانن

بەش سەرەکی مووشەک ڕەنگ پورتقالی پڕ وە ٢،٧ مەلیۆن لەتر لەلای کەمەو وە ئۆکسجین چڕ و هایدرۆجین کریا، و لە تاوسان گوزەشتە نزەکردن هایدرۆجین هیشت لە دویاترین چرکەیل دویەم تەقەلای وەشاننی پویچەڵ بکریەێد.

ناسا لەو وەختەو ئەو ریکارەیلە ئاڵشت کرد، و دووارە نووڕستن لە کارەیلی سەرکەفت.

یەکەمین تەقەلای وەشاننەگەیش لەوەر گیچەڵ یەکیگ لە ئامیرەیل مووشەکەگە پویچەڵ کریا.

هەرلیوا، ئەوەسا ئەو کەپسوولە دویای نزیکەی دوو هەفتە لە بازنەی دویریگ چەسپیەێد، ک تا ئیسە لە هەر کەشتییگ ئاسمانی دویرترە ک ئایەم لەناوی بوود.