ژنیگ سێ ساڵ لە رخ کۆڕۆنا خوەی و کوڕەگەی لەناو ماڵ زیندان کردیە

ژنیگ سێ ساڵ لە رخ کۆڕۆنا خوەی و کوڕەگەی لەناو ماڵ زیندان کردیە
2023-02-26T11:59:53+00:00
شەفەق نیوز/ پولیس هندستان، کۆتایی وە زیندانیکردن ژنیگ هاورد، ک وە ئارەزوو خوەی بڕیار دا تا ماوەی سێ ساڵ خوەی و کوڕەگەی لەناو ماڵیان زیندان بکەێد، وەبی دەرچگن لە ماڵ، ئەوەیش لە رخ تویشهاتن کۆڤید-١٩.

مونمون ماجی و کوڕ ١٠ ساڵانی، لەناو ماڵیان لە شار جوروگرام لە ویلایەت هارینای هندی، تا ماوەی سێ ساڵ زیندان بوین.

دویای تەلەفۆنیگ وەلایەن سوجان شوی ماجی، پولیس دەس دادەوەر، و کۆتایی وەو کار ئەڵاجەویە هاورد.

سوجان وتە پولیس رخی چوود ژن و کوڕەگەی تویش چشت بەدیگ هاتنە، چوینکە وەڵام تەلەفۆنی نیەن، وتیش: خوەی نیەتوەنێد بچوودە لایان چوینکە لە ویلایەت دویریگ کار کەێد.

  سوجان ئاگادار پولیس کرد ک ژنەگەی یە سێ ساڵە نیەیلێد بچوودە ماڵەو، نەک خوەی و کوڕەگەی تویش کۆڕۆنا بان.

لەو وەختە تا ئیسە شویەگە لەماڵیگ جیا نیشتیە، و چەوی نەکفتیەسە ئی ژن و کوڕیە، وەلێ تەنیا لەبان پەیوەندی ڤیدیۆ مەننە.

وەگورەی رووژنامەی دەیلی مەیل بەریتانی، پولیس پەیوەندی وەرد ژنەگە کردیە و دەرچگە قسەی سوجان راسە، و تەقەلا داگە واز لەو کەرەنتین درویژە بارێد، وەلێ ژنەگە هەر وتیە: رخم چوود لە کۆڕۆنا.

دویای چەن تەقەلایگ، ژنەگە رازی بوی پیشوازی لە پولیس بکەێد، و پولیسیش نووڕێد بڕ زواڵە و کەناڵخەی فرەیگ لەناو ماڵەگە کەڵەکە کریاگە.

پولیس وت: ژن و کوڕەگە خریانە چەودیاریکردن پزشکی، و هەواڵەیان ئەرا راویژکاری دەروینی کریا.

Shafaq Live
Shafaq Live