ئیمبڕاتۆڕ رخ
ئویشن؛ئیمبڕاتۆڕ رۆمانی "جاليكولا" یەکیگ لە ستەمکارە ئەڵاجەوەیل رۆمان بویە، کە شیتی وە پاتشایی خوەی هیشت داوا لە دارودەسەیلی بکەێد مانگ ئەرای بارنە خوار، و هەناێ وەپییان نەکریا، دەسنادە گیری، و ئویشن وەرسگی خستیەسە ناو مەردمەگە، تا لە میژوو باسی بکەن.
جاليكولا یەی نموونەیگ ئەرا شەڕ و شیتی مەزنەیی بویە، و خوەی کردیەسە خودای بان زەوی.
رووژیگ وەدروو وە وەزیرەیلی وت؛ دەرد گرانیگ گردمە، و ئەوەسە مرم، و دەسکردنە نزا ولاڵکیان تا خاسەو بوود، یەکیگ لەلییان وە ئاشکرا وت: خودا من بکەێدە قوربان جاليكولا، و یەکیگیش وت: نەزر ١٠٠ پویل تەڵایی کەم ئەگەر جاليكولا خاسەو بوود، وەناکاوەو جاليكولا دیار دا، و وپییان وت: ئەوەسا خاسەو بویم و نەمردم، و ئەو کابرا هاورد کە گیان خوەی کردە نەزر، و وەشمشیر ملی بڕی، و ١٠٠ پویل تەڵایی لەو کابرا زەفت کرد کە پویل کردە نەزری.
ئەوەگ زیاتر شیتی کرد ئەوە بوی کە مەردم رخیان لەلی چیاد، هەرچەن توەنن گردەو بوون و بکوشنەی، وەلی خوەیان دانە دەس رخ.
رووژیگ لە رووژان، وە کووڵ ئەسپەگەی هاتە ناو ئەنجومەن پیرەیل، یەکیگ لە وەزیرەیل رازی نەوی وە ئەسپەو باێدە ناو، جاليكولا وت: ئەسپەگەم لە تو خاسترە، چوینکە من هەڵگردیە، و دارودەسەیل چەپڵە ئەرای کوتان.
دویای ئەوە بڕیار دا ئەسپەگەی بکەێدە ئەندامیگ لە ئەنجومەن پیرەیل، و ئاهەنگیگ ئەرا ئی کارە سازی، و ناچار ئەندامەیل کرد، کە بایەسە گشتیان جویە و کەی بخوەن، و گشتیان ناچار بوین جویر ئەسپەگە، جویە و کەی بخوەن، تەنیا کابرایگ وەناو"براكوس" رازی نەوی، و جاليكولا تویڕە بوی، و بویە دەمەقاڵیان و "براكوس" لە ئەنجومەن دەرکرد، و ئەو کەسەیلە کە پڕ دەمیان کەی بویە، پشتگیری لە بڕیار جاليكولا کردن.
وەلێ "براكوس" تویڕە بوی، و کەوشەگەی وەڕوی ئەسپەگەی جاليكولا وەشان و هاوار کرد و وت: ئی ئەندامەیل ئەنجومەن پیرەیل، ئی دەمچەرمگەیل رۆما، تا کەی لەی ستەمە بیدەنگ بوین؟، ئیوەیش کەمیگ ویرە پەیا بکەن، تا لەی شیتە قورتار بوین.
لەی قسەیلە، ئەندامەیل کەفتنەو خوەیانەو، و بویە جەنگ گەورەیگ، تا گشتیان رمیانە مل جاليكولا و لەو شوینە کوشتنەی، و هەناێ خەوەر رەسیە مەردم، گشتیان دەرچگن، و وەشکیانە پەیکەرەیل جاليكولا وهویچیگ لەلی نەیشتن.
