چە کەفێدە دەس ئەسارەیل جەهانی لە ئینستاگرام؟

کریستیانۆ ڕۆناڵدۆ تەمەن ٣٨ ساڵ بویەسە تاکە کەس لە جەهان کە ئەکاونتەگەی لە "ئینستاگرام” رەسێدە زیاتر لە نیم ملیار کەس، زیاتر لە ٥٩٧ ملیۆن فۆڵۆوەر لە ئەکاونتەگەی هەس.

کریستیانۆ ڕۆناڵدۆ لە خانمە بازرگان و ئەسارەی ئەمریکی، کایلی جێنەر، زیاترە و فرەترین داهات لە "ئینستاگرام" دیرێد.

رۆناڵدۆ ئەرا هەر ریکلامیگ کە لە لەبان ئەکاونتەگەی لە "ئینستاگرام” بڵاوی کەێد بڕ ١،٨٧ ملیۆن پاوەن کەفێدە دەسی.

وەگورەی ماڵپەڕ "Hopper HQ" کە تایبەتە وەی باوەتە، ئەسارە پورتوگالییەگە لە کایلی جێنەری ئەوبانترە، کە ئەرا هەر پۆستیگ یەک ملیۆن و ٤٧٠ هەزار پاوەند وەدەسی کەفێد.

رۆناڵدۆ فرەجار لە ئەکاونتەگەیەوە بڕیگ لەو برادەرەیلیە بانگەشە کەێد کە گریەبەسی وەردیان کەێد، جویر سایت وەرزشی "LiveScore" و براند تەندروسی "Therabody" و ئاڵوگۆڕ دراو کریپتۆ "Binance".

لە پلەی سێیەم، لە دویای کریستیانۆ رۆناڵدۆ و کایلی جێنەر، ئەسارەی ئەرجەنتینی لیۆنێل مێسی تیەێد، بازیکەر تیپ ئینتەر میامی ئەمریکی، وە بڕ ١،٣٨ ملیۆن پاوەن ئەرا هەر بڵاوکردنیگ کە لەهەژمارەگەی،  شمارەی فۆڵۆوەرەیلی رەسێدە ٤٧٩ ملیۆن کەس.

خانمە گورانیچڕ ئەمریکی، سێلینا گۆمێز، لە پلەی چوارەمە وە بڕ ١،٣٥ ملیۆن پاوەند ئەرا هەر پۆستیگ، دویای ئەویش هاوڕێ ئەکتەرەگەی، دوین جۆنسۆن کە وە "زە ڕۆک" ناسریاس، لە پلەی پەنجەمە وە ١،٣٣ ملیۆن پاوەند ئەرا  هەر ریکلامیگ.