پەیغەمبەریگ لە ئەمریکا... ٢٠ ژن خوازیە و شکەنجەی کومانکەرەیل داگە
شەفەق نیوز/ بەڵگەنامەیلیگ دریانە دەس دادگای فیدرالی ئەمریکا، ئمڕوز پەنجشەممە، ئاشکرا کردن، ک کابرایگ بویەسە ریبەر بڕیگ کەس ک باوەڕ وە فرە ژن خوازین دیرن، لەلای کەمەو ٢٠ ژن خوازیە، و فرەیان ناخاڵەن، و لایەنکرەیلی پویل و ژن وەپی دانە، و شکەنجەی لایەنگرەیلی داگە ئەگەر گومان لە پەغەمبەرایەتیی بیاشتان.
ئێف بی ئای وت: ساموئێل بیتمان (٤٦ ساڵان) ئەدام بویە لە کلیسەیگ، و کلیسە وەجی هیشتیە و بڕیگ مەردم وەدەور خوەی گردەو کردیە، و بویەسە پەیغەمبەریان.
بیتمان بڕیگ پویل لەو پیاوەیلە ک باوەڕ وەپی داشتنە ئەرای هاتیە، و هەمیش ژن و مناڵەیلیان وەپی دانە. .. وەگورەی تووڕ سی ئێن ئێن ئەمریکی، بیتمان ک لە ساڵ ٢٠١٩ خوەی کردیەسە پەیغەمبەریگ، وتیە: ئەو وەرپرس کلیسە ک جارانی وەگەردی کار کردیە، داوا لەلی کردیە روح خودا ئەرا ئی مەردمە بچڕێد، و ئەویش باوەڕ وە جیوەجیکردن خوازین باوگ ئاسمانی داشتە، ئەراوە ئەو کارەیل سێکسیە کردیە.
ئێف بی ئای، باس ئەو کردەوەیل سێکسیە وەلایەن بیتمان کرد ک بیتمان وتیە: ئەوە جیوەجیکردن ئەرک خودایی بویە.
بیتمان خەڵک ویلایەت ئەریزۆنا، وتیە خودا خوازێد ئەو کەسەیلە ک باوەڕ وەپیم دیرن ژن و مناڵەیلیان ئەرا کارەیل سێکسی لەلای من کل بکەن.
سێیان لە ژنەیل بیتمان، هەرلە؛ نعومی بیستلاین، دۆما بارلۆ، موریتا روز جۆنسن، کەفتنەسە وەر توومەت رفیان، و بڕیارە بیستلاین و بارلۆ رووژ چوارشەممەی ئایندە بانە دادگا.
