سلێمانی.. داوەزین پلەی گەرمی بازار فەرش زینەو کەێد

شەفەق نیوز/ وەگەرد داوەزین پلەێل گەرمی و هاتن وەرز زمسان، مەردم ئەرا داپووشین ماڵەێلیان رۊی وەرەو دوکانەێل فرووشتن فەرش و قالی کەن، ناوماڵەێل جوراوجور بازار گرێدەو وەر، باواجی ئەوەگ  لە بازارەێل هەرێم کوردستان و عراقە فیشتر دروس بۊی تورکیا و ئیران و چینە.  

ئاژانس شەفەق نیوز چەوی کەفت وە چەن قالی فرووشێگ، و کڕیارەێل لە پارێزگای سلێمانی لە هەرێم کوردستان، و پرسیار لەباوەت فروشەێلیان و هاتن مەردم و کوالێتی جوور فەرشێلە کرد.  

یەکێگ لە بازرگانەێل فەرش، ئازاد عەلی ئەرا ئاژانس شەفەق نیوز وت: " ئمساڵ فرووشیان فرە خاسترە وە چەو ساڵەێل گوزەشتە، هەرێم لە گوزەشتە قەێران دارایی دی وە خوەی ک فەرمانبەرێل رەنج دینە خوەیان، بی گومان کاریگەری فرەێگ کەێدە سەر بازار، باواجی دومای هاتنەوەی مووچە و خاسەوبووین پسای ماددی فەرمانبەرەێلە ڕێژەی فروشتن زیاتر بەرزەو کرد".  

و باسکرد " لێرە  جوراوجور چینەیل قالی لە دوکانەیل سلێمانی هەس، باواجی مەردم فیشتر تورکیەگە پەسەن کەن لەوەر هەرزانیەگەی وەچەو نڕخ ئیرانی ک خاسترین جوور فەرشە.    

ئاراز عەلی نشان دا ، " هاوڵاتیەێل سڵێمانی رەفتار جیاوازێگ دیرن ئەرا فەرش ک جیاوازە وەگەرد رەفتار گشت پارێزگایەێلتر، سەرەرای بڵاوبۊین فەرش تورکی لە ناوچەێل تر هەرێم خەڵک سلێمانی فەرشەێل چەرمگ و رەنگ کاڵ  پەسەن کەن ک ئی رەنگەێلە لەلایەن مەردمێلتر پەسەن ناکرێد.  

لەباوەت نرخ فەرش زمسانی ئاراز وت: " نرخەێلیان لە (3،500)دینار دەسکەێدە وەپێ تا رەسێدە  (15،000) دینار ئەرا یەک مەتر هەرجورەو نرخێگ دیرێد".      

ئەحمد عومران (کریار) مۆکیت تورکی و فەرش ئیرانی وە خاس دانەێد سەرەرای گرانی نرخ فەرش ئیرانی لای ئەو خاسترینە"، دوکاندارەێل فەرش داواکارن ک" نرخەێل بەشیگ لە فەرشەێلە دابوەزێد، گرنگی وە خێزانەێل کەم دەرامەت بدرێد ک توانای سەنیین نێرن".    

بازرگان  حاجی موحەمد غەفور، " داواکاری لەبان هاوردن فەرش ئیرانی فیشترە وە بەراورد فەرش و مۆکیت تورکی ، لە وەختیگ نرخ فەرش ئیرانی فرە گرانترە، ئەرا نمونە نرخ یەک مەتر چوارگۆشە لە مۆکێت و فەرش تورکی هالە ناو 2-5 دۆلار، باواجی نرخ یەک مەتر چوارگۆشە لە فەرش ئیرانی رەسێدە 22 دۆلار".