کیسەڵیگ لە ئاسمانەو زەخمدار ژنیگ ئەمریکی کەێد

شەفەق نیوز/ فرە جار سەنگ و کوچگ دەن لە جام ماشینەیل، یا رانندەیگ یا سواریگ زەخمدار کەن، وەلی ئیجار کیسەڵیگ بوی.

ژنیگ ٧١ ساڵان وەگەرد دوێەتەگەی لەبان رییگ لە فلۆریدای ئەمریکا، لەناو ماشین خوەیان بوین، وەناکاوەو کیسەڵیگ شیشەی نوایینەی ماشینەگە شکان، و ئەرایان هاتە ناو، و داگە تییوڵ ژنەگە و زەخمداری کرد، وەگورەی رۆژنامەی دایتونا بیچ نیوز جوڕناڵ ناوخۆیی .

دوێەتەگە ماشینەگە لەکنار رییەگە وسان و دەسمیەتی لە رانندەیگ تر وەرگرد.

تا خوین فرەیگ لە تییوڵ ژنەگە دەرچگ، وەلێ زەخمەگەی سەخت نییە.

شایەت ئەو کیسەڵە خوازێد لە جادەگە بکەێدە ئەودیم، و ماشینیگ تر تلانەی و هەڵتەرازیا وەرەو ئاسمان، ئیجا لە ئاسمانەو داگە ماشین ژنەگە.

و کیسەڵیش ساق و ئاسودە لەناو ماشینەگە مەرقەز کریا، و تەنیا چەن کڕیگ وەقەی قەڵغانە سەختەگەی بوی.