ئەسپ دانا
کوڵە چیرووک
ئەسپ کابرایگ کشاوەرز کەفتە ناو بیر قویلیگ، وەلێ بیرەگە هشک بوی، ئەو ئەسپ بەسەزوانە دەسکردە هویلە و هاوار لە ژان کەفتنی، تا چەن ساعەتیگ وەیجویرە تا خاوەنی ئاگادار بوی، وەلێ نیەزانێد چوین ئی ئەسپە لەبن بیرەگە بارێدە دەیشت.
خاوەن ئەسپ، تەقەلای فرەیگ نەیا، و وەگەرد خوەی وت؛ ئی ئەسپە پیر بویە و تا لەناو بیرەگە بارمەی دەیشت بایەسە چەنە سەنین ئەسپ نوویگ خەرجی بکەم، بیجگە ئەوەیش ئی بیرە ئاو لەناوی نەمەنیە، خو دی نە ئەسپ وەکارم تیەێد و نەیش بیر.
کشاوەرز خاوەن ئەسپ، داوا لە هاوسایلی کرد بان دەسمیەتیی بیەن تا ئی بیرە پڕەو بکەن، تا لە هەردوگی قورتار بوود.
مەردم ئاوایەگە وە بیەڵ و قوڵەنگ هاتنە پڕەوکردن بیرەگە.
ئەسپ زوانفام لە بن بیرەگە دی زانست کە خاوەنی دەس لەلی شووردیە، و دی خوازێد زنیوەچاڵی بکەێد، ودەسکردە هویلە و هاوار، وەلێ دویای کەمیگ دەنگی کپەو بوی.
مەردم دویای یەگ دەنگ ئەسپ بڕیا، لە پڕەوکردن بیرەگە وسیانەو تا بنووڕن چە بویە لەبن بیرەگە، تا نووڕین ئەسپەگە وەبان چوار پا وسیاگە، و هەناێ خوەڵ کەفێدە بانی پشت خوەی تەکنێد، و یەی گام چوودە بان خوەڵەگە و بەرزەو بوود، کە چەنیگ مەردم خوەڵ ئەرا بانی وەشنن ئەو وەو خوەڵە بنگزیگ چوودە بان، تا کەکەم هاتە نزیک دەم بیرەگە، و یەک باز کوتا و هاتە بان زەوی.
چماێ ئەسپەگە وەی کارە وت: ئەگەر کەسیگ بتواێد، رەسێدە بان، هەرچەنیگ مەردم بخوازن بوەنەی خوار.
