زانایلیگ ئیسرائیلی ئاشکرای جیماگەی ئەفیون ٣٥٠٠ ساڵە کەن
شەفەق نیوز/ زانایلیگ ئیسرائیلی لە ئاسەواری، باس ئاشکراکردن جیماگەی ئەفیون لەناو قاوەیکیگ خەڕگین کردن ک تەمەنی ئەرا ٣٥٠٠ ساڵ چوودەو، ک دەسنشان وەکارهاوردن ئی مادە کەێد لە رسوومەیل وەخاسکسپاردن کۆنە.
ئەو پەیاکردنە ک وە کۆنترین بەڵگە لەبان وەکارهاوردن هوشبەر لە جەهان دریەێدە قەڵەم، لە ئەنجام تۆێژینەوەی هاوبەشیگ هات ناوبەین دەسەڵات ئاسەواری ئیسرائیل و پەیمانگای زانستی وایزمان.
هەردوگ لایەنەگە لە ساڵ ٢٠١٢ دەسکردنە مینەکردن، دویای ئەوە ک چاڵکەنین لە ناوچەیگ ناوڕاس ئیسرائیل بڕیگ قەور لە دویادویای سەردەم برۆنزی خستەدەر.
تۆێژینەرەیل لەو شینە قاجاخەیلیگ خەڕگین وەشیوەی بەر خشخاش پەیا کردن ک ئەفیون لەلی دروس کریەێد، و میژووی ئەرا سەدەی چواردەهەم وەرجە زایینی چوودەو.
زانایل لە بەیاننامەیگ دیاری کردن ک ئەو قاجاقەیلە ئەرا هەڵگردن ئەو هوشبەفە وەکار هاوریانە، لە وەختیگ ک وەرجەیە وتن ئەرا رسوومەیل وەخاسکسپاردن لەلای کەنعانیەیل وەکار هاوریاگە.
رۆن بنیری زانای ئاسەواری ئیسرائیلی، مەزەنە کرد ک ئەو قاوەیلە نریاسە ناو قەورەیلیگ لە رسوومەیل چەمەری مردگەیل.
بنیری وتیش: کەسەیل بنەماڵەگە یا کاهینەگە تەقەلای دەێد فریشتەی مردگەیل بچڕێد و بچوودە ئاست سەرخوەشی وە ئەفیون.
وتیش: ئەو جیماگەی ئەفیونە ک پەیا کریانە، وە ئاو یا وە شەراب کاڵەو کریانە.
