چیرووک ئەو ژنە کە ناوی لە ١٦ کۆمپانیا هەس و لە هویچیان کار نیەکەێد
میدیایل وڵات چین بڵاو کردنە کە ئەو ژنە کە وە ناویگ درووکانی (هو گوان) ناسیایە، دەسکاری زیاتر لە دەیان خاوەنکار کردیە و لەلای کەمەو تا ماوەی سێ ساڵ مووچە لەلیان گردەو کردیە، وەبی ئەوەگ لە راسیەو هویچ کاریگ لەناو یەکیگیان بکەێد.
گوایە ئەو ژنە خوەی و شویەگەی کە ئەویش لەی کارە توومەتبارە، ناوی لەبای خاوەنکارەیل توومار کردنە و ئەرک ئەو ژنە لە هەر کۆمپانیایگ دیاری کردنە، و مەوقەی دەیکردنی وەکار لەناو هەر کۆمپانیایگ نویسانە و هەژماریگ بانکییش دەسنشان کریایە تا مووچەی مانگانە بوەێد .
(گوان) وەردەوام کەفتیەسە مینەی راگەیانن داوای کار لەلایەن کۆمپانیایل، و چیادە چەوپیکەفتن لە کارە نووەیل، و وینە ئەرا خاوەنکارەیل کل کردیاد کە هاناو کارەگە، و هەر وەیجویرە گشتیان خەڵەتانیە، و پلانەگەی ئەوەنە خاس وەڕیەو چگە کە توەنستیە لەناو شوقەیەگ گرانبەها لە شار شەنگەهای بنیشێد.
پلانەیل (جوان) ئەرا کارە نووەیلی رەسیەسە ئەو ئاستە کە لە یەک وەخت چەن چەوپیکەفتنیگ کار ئەنجام داگە، و هەمیشە کۆمپانیایگ ترەک پەیا کردیە کە کار لەناویان بکەێد.
وەداخەو ئەرا ئەو، پلانەیلی لە مانگ یەکی ساڵ گوزەشتە دەسکردنە شیوانن، هەناێ یەکیگ لە خاوەنکارەیلی نامەیگ لە گوان لەلای گروپیگ کار ئۆنلاین پەیا کرد. کە خاوەن کۆمپانیایگ تەکنەلۆژی وەناو لیو جیان گوان پەیا کرد.
ئەو پیاوە کە ئەندام یەکیگ لەی گرووپەیلە بویە، فامست کە گوان لە کۆمپانیایگ ترەک کار کەێد لە وەختیگ ئەو وە تەواوی وەخت لە کۆمپانیا تەکنەلۆژییەیل کار کەێد.
دویای لێکۆڵینەوەی زیاتر، لیو جیان ئاگادار پولیس کرد.
ئمجا ئەرا پولیس ئاشکرا بوی کە گوان بەشیگ بویە لە ساختەکارییگ فراوان کە میژووەگەی لەلای کەمەو سێ ساڵ وەرجە ئیسە بویە و قازانجەگەی لە ٥٠ ملیۆن یوان (زیاتر لە هەوت ملیۆن دۆلار) رەد کردیە.
ئەوە ئەڵاجەویە، کە گوان مەوقەی چەوپیکەفتنیگ ئەرا کار نوویگ دەسگیر کریا.
ئیجا ئاشکرا بوی کە لە مەوقەی دەسگیرکردنی ١٦ کار داشتیە، بەڵام هویچ کاریگ راسی لە هویچ کامیان نەکردیە، و مانگانە مووچەیان خواردیە.
