چیرووک ئەو ژن عراقیە کە توومەتبارە وە کوشتن هاوشیوە جەزائیرەگەی لە ئەڵمانیا
رووژنامەی "زە گاردیان" بەریتانی بڵاو کردیە کە سەرەتا دەسەڵاتدارەیل لەلای خوەیانەو ئەو ژنە کە ناوی "شەهربان"ە، قوربانی کوشتن بویە، هەناێ لە مانگ ئاب ساڵ گوزەشتە تەرم ژنیگ گەنج کە بە خەڵپان خوین بویە، لەناو ماشینیگ مارکەی مێرسیدس کە وسیاوێد لە شار ئینگۆڵشتات لە باشوور ئەڵمانیا پەیا کریا.
وتیش: فرە لە ئەندامەیل بنەماڵەی "شەهربان"یش لەلای خوەیانەو کە تەرمەگە هن خوەیە، بەڵام لە راپۆرتیگ پزیشکی دادوەری پرسیار لەبان ناسنامەگەی دروس کردیە لەوەر خاڵیگ (تاتۆ) کە هن خوەی نەویە.
ئیجا ناسنامەی قوربانییەگە وە ناو خەدیجە ناسریا، بلۆگەرێگ مۆدە و جوانکاری تەمەن ٢٣ ساڵ و بنچینەی جەزائیری و لە شار هایلبرۆن، لە ویلایەت بادن-ڤورتمبێرگی هاوسای ئەو ویلایەتە بویە.
وەپەی رووژنامەگە، ئەو دوو ژنە وە شیوەیگ فرە نزیک شیوەیان لەیەک کەێد، هەردووگیان گیس درویژ سیا دیرن و پووس و دەموچەویان فرە لەیەک چوود.
داواکارەیل گشتی لە مەوقەی ڕاگەیانن توومەتبارکردنەگە باس ئەوە کردیە، شەهربان توومەتبارە وەوە کە 10 هەزار یۆرۆ پیشکەش وە پیاییگ کریە تا لە کوشتن زاواگەی دەسمیەتیی بەێد.
گوایە ئەو ژنە پیشەکی پەنج هەزار یۆرۆ وەپی دایە، بەڵام ئەو پویلەگە بردیە وەبی ئەوەگ داواکارییە دووارەیلی وە ئەنجامدان کوشتنەگە جیوەجی بکەێد.
رووژنامەگە باس ئەوەیش کرد کە شەهربان دویای نزیکەی ساڵیگ لە جیوەجیکردن تاوانەگە دان وە توومەتەیل نایە و لەوەردەم دادگا ئامادە بوود ئەرا رویوەڕویبوین توومەتەیل.
دەرکەفتیە کە توومەتبارەگە وە ساختەکردن مردنەگەی و دەسکردن وە ژیان نوویگ و قورتاربوین لە ژیان ئیسەی لەوەر ناکۆکی خیزانی تاوانەگەی ئەنجام داگە.
داواکار گشتی باس ئەوەیش کرد کە شەهربان پەیوەندی وە بڕیگ ژنەو کردیە، لەڕی هەژمارەیلیان لە ئینستاگرام، وەرجە ئەوەی کە ئەو دویەتەیلە پەیا بکەێد کە تا رادەیگ لەشیوەی خوەی کەن.
لە 9 ئاب 2022، دەرفەت بەشداریکردن لە کلیپیگ ئەرا خەدیجە وەگەرد گورانیچڕیگ ناودیار هات.
کی لە گومان ئەو داواکارییە، تەلەفۆن ئەرا گورانیچڕەگە کرد؟، کە ئەویش ئاگاداری کردیە کە مکیسەگە درووکانیە.
دویای دوو رووژ، خەدیجە داواکاری نوویگ لە شەهربانەو ئەرای رەسیە، لە هەژماریگ تەرک ئینستاگرامەو، کە چارەسەریگ بیوەرانوەر لە ستۆدیۆی جوانکارییەگەی پیشکەشی کرد، لە وەرانەوەر ئەوە ریکلامیگ ئەرا ساڵۆنەگەی لە ئینستاگرام بڵاو کردیە.
وەڕاسی لە ١٦ی ئاب ساڵ گوزەشتە دیداریگ لە ناوەین شەهربان و خەدیجە بوی، هەناێ ماشینیگ مێرسیدس رەنگ سیا هاتە ماڵ خەدیجە و شەهربان و شاکر لەناوی بوی.
لە گەردینیان لە دارسانیگ وەسیان و خەدیجە رازی کردن لە ماشینەگە داوەزێد، وەرجە ئەوەگ وەردەوام بوون لە جیوەجیکردن پلانەگە وە دەسوەشنانن لە پشت و سەری، و ئەویش کەفتە بان زەوی، وەرجە ئەوەگ ٥٦ گلە وە چەقوو لەلی بیەن.
داواکاری گشتی باس ئەوەیش کرد کە لاشەی قوربانیەگە وەتەواوی بڕیایە، تا ئیسەیش چەک کوشتنەگە پەیا نەکریایە.
دویای ئەوە هەردوگ توومەتبارەگە ماشینەگەیان لە جادەیگ نزیک ماڵ شەهربان وساننە، و لەورا داڵگ و باوگی تەرمەگەی لەناو ماشینەگە پەیا کردنە، و سەرەتا لەلای خوەیانەو هن دویەتەگیان بویە.
