چیرووک ئەو کابرای بەریتانیە کە یە ١٥ ساڵە واز لە پویل هاوردیە
بوێل کە ناوی وە (پیاوە بیپویلەگە) ناسریا، لە زانکۆی ئابووری دەرچگە، و کاریگ وە مووچەی خاسیگ لە شار بریستول لە بەریتانیا کەفتە دەسی.
ئەو کابرا، ژیان خوەشیگ پڕ لە خەرجکردن و سەنین دڵنگ و نووترین مۆبایل و خاسترین خواردن و نووشین وەسەر برد.
وەناکاوەو، یەکیگ لە شەوەیل ساڵ ٢٠٠٧، لەناو دانیشتنیگ فەلسەفەی وەگەرد برادەرەگەی، باس گیچەڵەیل جەهان کردیان، و باس چوینیەتی چارەکردنیان کردن، چشتیگ ئاڵشت بوی.
بوێل ئویشێد: دویای ئەو قسەکردنە، زانستن کە پویل خوەی بویەسە مدوو ئەو هەمکەی گرفتەیلە، و وتار غاندی کەفتە هويرم کە ئویشێد: خوەد بووە ئەو ئاڵشتکردنە کە خوازێد لە جەهان بوینێدەی.
لە قسەیگ وەگەرۆ تووڕ سی ئێن ئێن ئەمریکی، ئەو پیاوە کە خوەسەی لە پویل تیەێد، وت: هەناێ رەسیمە ئەو باوەڕە کە پویل خوەی بویەسە مدوو دروسبوین گشت گرفتەیل جەهان، رەسیمەو کە پویل هویرمان و کردەوەمان و رەفتارمان لەیەکەو چەکنێد، ئەراوە بڕیار دام واز لە پویل بارم.
دویای وەخت کەمیگ، بوێل ماڵە گرانەگەی فرووشت، و چینە ناو کەلاوەیگ.
یەکەم مانگەیل لەبان بوێل سەخت بوی، چوینکە بایەسە چشتەیلیگ لە ژیانی ئاڵشت بوود، و چشتەیلیگ لە ژیانی نەمینێد، جویر قاوەی شەوەکیان، کە کەفتە فتراق وەدەسهاوردن چشتەیلیگ وەپەتی لە سروشت.
بوێل وتیش: دویای چەن مانگیگ کارەگە فرە ئاسانەو بوی، و واز لە چاشیان ئەو رۆتین جارانیە هاوردم.
دویای ئەوە بوێل ناودارەو بوی هەنای کتاو (پیاویگ بی پویل) بڵاو کرد، کە لەناوی باس ئەو ژیان نووە وەگەرد سەختیەیل ئاڵشتبوین ریشەیی لەناوی کرد.
لە ساڵ ٢٠١٠ نویسان: ئەوەگ جی باسە، کە دوو ساڵ گوزەشتە وەبی پویلی، فرەترین رازی بویم لە ژیان خوەم، کە برادەرەیلیگ لە جارانی فرەتر ئەرام پەیا بوی، و لەو وەختەو تا ئیسە بیمار نەویمە، و لەشم گەرجترەو بویە، کە زانستم برادەری ئارامی راسیە، نەگ پویل.
لە ساڵ ٢٠١٧، بوێل بڕیار دا رەفتار ژیان سادەی بڕەسنێدە ئاستیگ ترەک، کە بڕیار دا واز لە تەکنەلۆژیا بارێد، جویر کارەبا و ئاو لویلە، و رادیۆ و ئەنتەرنێت.
لەی باوەتە، ئەرا سایت "No Fun Tips" وت: ئی رەفتار ژیانە کە ئیرنگە وەسەری بەم، فرە جار وەپی ئویشن (ژیان سادە) وەلێ یە هویچ راس نییە.
وتیش: لە راسی خویچ ئاسان نییە، چوینکە چشتەیل فرەیگ خوازێد تا ژیانیگ سروشتی وەسەر بوەێد، باوجی ژیان جارانییم سادە و ئاسان بوی، وەلێ هەزاران چشت لەناوی بوی.
