چیرووک رخبەریگ ئەرا دویەتیگ میسری چوین باوگ خوەی کوشتیە
سەرچەوەی ئەمنی ئاشکرا کەن کە ئەو دویەتە لە تەمەن ١٥ ساڵان ئی کارە کردیە، و باوگ خوەی کوشتیە، یەچەس باوگەگە تەڵاق داڵگی داگە و دەس لەلی وەشانیە.
تاوانەگە لە شار ئەتفیح سەروە جیزە لە باشوور قاهیرە بویە، کە پولیس ئاگادارییگ ئەرای رەسیە کە ئاگر لەناو شوقەیگ هیز گردیە و کەسیگیش لەناوی مردیە.
هەناێ پولیس و بەڵگەی پزیشکی دادوەری و داواکاری گشتی رەسینە شوین ئاگرەگە، دەرکەوت کە تەرم کەسیگ سزیای بویە، و دەرکەفت خاوەن شوقەگەس.
وەگورەی سەرچەوەیگ ئەمنی کە قسە ئەرا "سکای نیوز عەرەبی" کردیە، دەسەڵاتدارەیل گومان لەوە داشتنە لویلەی بتوڵ غازەگە لەلایەن کەسیگ واز کریایە، و لەیرەو دەسکردنە مینەی ئەو کەسە تا بڕەسنە بندروس رویداوەگە.
لە لێکۆڵینەوە ئاشکرا بویە کە قوربانییەگە (تەمەن 36 ساڵ) لەی دواییە لە ژنەگەی جیاوە بویە و تەنیا وەگەرد دویەتەگەی مەنیە.
پولیس داوای دویەتەگە کرد، دەرکەفت لەئەنجام ئاگرەگە هویچیگ وەی دویەتە نەهاتیە، مەوقەی پرسیارکردن دویەتەگە لەپڕک چگ و دەسکردە متەمت و قسەیل بیسەر وپا، و هەناێ زانست کە رسوا بویە، ئاشکرای تاوانەگەی کرد کە خوەی لویلەی غازەگە واز کریە، و غازەگە وەو ناوە مەرەقەز کردیە.
وەقسەی سەرچەوەگە؛ دویەتەگە وتیە؛ باوگی وەبان مادەی هووشبەر چاشیایە، ئەراوە هەمیشە دەمەقاڵ و مرافە وەرد داڵگی کردیە، تا لەیەک جیاوە بوین.
وتییشە؛ رووژەیل سەختیگ وەگەرد باوگی دیە، و سەرگەردان داڵگی کردیە، یەیش لەبان ئەوە مینەی دەرفەتیگ کردیە تا تووڵەی ئەو کردەوەیل باوگیە لەلی بسینێدەو، تا هویر وەی تاوان دڵتەزنە کردیە، و ماڵەگە پڕ لە غاز کردیە، و خوەی دویرەو کەفتیە و چەوەڕی کردیە باوگە ئاگریگ ئەرا جگارە دەم بەێد، و گشت ماڵەگە گوڵپە لەلی هەڵسێد.
