رووژێگ ئەڕا ریشنەێلە
شەفە نیوز/ هەر وەساڵ، دە یەکم شەمەی سەر مانگ نۆوامبر ساڵ زایینی، رووژێ نامگیرەو کردنە ئەڕا ریش و ریشنەێلە.
دە ئیچوونە رووژێ هەمیشە جەژن و جەژنوارەێلێ دە سەرانسەر دنیا دگرێ.
ریش هەمیشان ئەڕا پیاگەێلە بەشێ لە فەشن و مۆد و مۆدوازی بییە.
بڕێ تاشین ریش وە پرچ و پاکی دزانن، بڕێ تر وە نیشانەێ دەورێش بیین و ئەڤداڵی. دە سەرەتاێ جمێشت کموونیستییش دە کشوەر شەورەوی "سۆڤیەتی" ئەوسا، ریشداری وە ماناێ پاوەنە و دڵوەنەێ ئیدئۆلۆژی کومونیستی و مارکسیستی بی.
ئێسەیش وەک ِ ئەوسا دوارە وە ریش و کووپاڵێ ک داش و ئەلقاعدە و هووز تاڵبان کردنەسەێ باو ریش و مەحاسن لە نوو کریاگەسە نیشانەێ دینداری لە لاێ تۆنەمەزاوەێل ئوو دە لاێ فرە لە وڵاتوەندەێلیش دە نامدوئاوان "مزوپتۆمیا" بییەسە سەمبوڵێ ئەڕا تۆتد وتێژی و تروریستایەتی.
دە دنیا هێمان مۆدخوازەێلە، ریش وە چشت خاسێ ئەڕا خوەێئەڵڕازانن پیاگەێلە دزانن ئوو ریش پرۆفسوری ناین، بنریش نڵن، کوڵ و دریژ کردن جانگییەێل، کڕ ریش نین، تۆکن کردن، تەرکیب ریش و سێوڵ وەرد یەک کردن، رەنگ و راز دیان، خەنە ناین، حەتتا وەرەلا کردن ریش دە نام هۆنەرمەندەێلە ئوو فرە جوورەێلێ تر نیشاندەر یارمەتی گرتن لە ریشە ئەڕا رازانن.
ئەوسا فرە لە پاتشا و پاشاێلیش، میەرگ و گژگەێل وەگەرد رەنگاورەنگ ریش خوەیان ئەڵڕازاننە.
