رویداویگ ئەڵاجەوی.. ژنیگ سێ گلە وە ماشین خوەی تلیەێد
شەفەق نیوز/ ژنیگ لە تەمەن ٣٥ ساڵە، لە سانت گالن، تویش زەخمەیل سەختیگ هات، هەنای ماشینەگەی خوەی سێ گلە تلانەی، وەگورەی قسەی پولیس شارەوانی لەو شارە ک کەفێدە باکوور خوەرهەڵات سویسرا.
وتنیش: ئەو خانم رانندە، لەناو ماشین بویچگ خوەی هاتە خوار تا چشتیگ لە سەندوق پشتەگەی درارێد، باوجی ماشینەگە وەکار هیشتە جی.
ماشینەگە ک لەبان تەپەی نیمچە بەرزیگ وسیاوێد، دەسکردە جویلەکردن وەرەو دویا.
خانم خاوەن ماشین هەوڵ دا تا ئەو ماشینە گیر بارێد، باوجی کەفتە بان زەوی، و ماشینەگە تلانەی، و یە یەکەم گلە بوی.
وەگورەی ئاژانس "ئی تی ئێس" لە زوان پولیس وت: ماشینەگە وەبی رانندە وەبان لەش ژنەگە رەد بوی، و جاریگتر خڕیگ خوارد، و هیمان ژنەگە لەزەوی هیز نەگردیە، تا ئەرا گلەی دویەم تلانەی.
وەگەرد ئەوەیش، ماشینەگە روی کردە کنار بەرزیگ لەبان ریەگە، و دووارە هاتە دویا، تا ئەرا سێیەم گلە وەبان لەش ئەو خانم خاوەنیە رەد بوود، تا تەیمانەیگ چووین نوای ئەو ماشین وەرەلا گرد و وسانەی.
ماشین فریاکەفتن ژنەگە رەسانە خەسەخانە، ک ڕاپۆرتەیلیگ وتن زەخمەیلی سەختە.
