دویەتیگ لە ئەڵمانیا مینەی دویەتیگ وەشیوەی خوەی کەێد تا بکوشێدەی
![دویەتیگ لە ئەڵمانیا مینەی دویەتیگ وەشیوەی خوەی کەێد تا بکوشێدەی](https://media.shafaq.com/media/arcella/1675245295862.jpg)
وەگورەی پولیس ئەڵمانیا، ئەو دویەت عراقیە لە تەمەن ٢٣ ساڵان، تواستیە خوەی لە گرفتەیلیگ خیزانی قورتار بکەێد.
وەگورەی فرانس پرس؛ تەرم ژنیگ لە تەمەن ٢٣ ساڵان لەناو ماشینیگ لە ناوچەی ئینگولشتات پەیا کریا، وەچەقوو کوشیاگە.
پولیس مەوقەی پەیاکردن تەرمەگە وت یە خاوەن ماشینەگەس، و بنەماڵەی دویەتەگەیش وتن یە دویەت خوەمانە کوشیاگە.
باوجی لەی رووژەگە، پزشک داودوەری ئاشکرا کرد ک یە تەرم ئەو دویەتە نییە ک خاوەن ماشینەگەس، و دویەت ئەو بنەماڵەیەش نییە، و ئاشکرا بوی ک ئەو دویەتە هیمان زنیە.
دویای لێکۆڵینەوە، دەرکەفت ک دویەتەگە هیمان زنیە، و خوەی ئی پلانە داناگە و کەسیگ دەسمیەتیی داگە تا ئی تاوانە جیوەجی بکەێد.
پولیس رەسیە دویەتەگە و ئەو کەسە ک وەگەردی بویە، و ئیسە هانە لێکۆڵینەوە.
پولیس ئاشکرا کرد ک ئەو دویەت توومەتبارە، خوازیە خوەی لە گرفتەیلیگ خیزانی لەمەردم بشارێدەو، و تواستیە مەردم بزانن ک خوەی مردگە تا قورتار لەو گرفتەیلە بوود.
وتیش: ئەو دویەت ئەڵمانی عراقیە، لەبان ئەنتەرنێت کەفتیەسە مینەی دویەتیگ وەشیوەی خوەی بوود، تا بکوشێدەی و کاریگ بکەێد تا بویشن یە تەرم خوەیە.
پولیس وتیش: دویەتە توومەتبارگە، وەرجە کوشتن دویەتە قوربانیەگە، وەگەرد چەن دویەتیگ پەیوەندی کردیە ک لە شیوەی خوەی کەن، و داوا لەلیان کردیە چەویان بکەفێدە یەک.
تا رەسیە ئی دویەت قوربانیە، و قوربانیەگە فرە لە شیوەی تاوانبارەگە کەێد.
دویەتە قوربانیەگە رازی بویە وەگەرد تاوانبارەگە چەویان بکەفێدە یەک، و تاوانبارەگە وەگەرد کەسیگتر چینە تا قوربانیەگە لە ماڵی لە ناوچەی هایبرون بارن.
لە ڕی، دویەتەگە لەناو ماشینەگە دراوردنە، و بردنەسەی ناو دراسانیگ و لەورا وەچەقوو کوشتنەسەی، و هاوردنەسەی ناو ماشین دویەتەگە تا بویشن یە خوەیە.