خەڵات نۆبڵ ئەرا ئەدەب دریەێد وە نویسەریگ نەرویجی
2023-10-06T09:08:15+00:00
شەفەق نیوز/ خەڵات نۆبڵ لە ئەدەب دریا وە نویسەر نەرویجی جۆن فۆس لەبان "شانۆنامە و نویسان پەخشانی، کە دەنگیگ وەبی قسەکردن دیرن"، وەگورەی ئەکادیمیای سویدی.
فۆس لە تەمەن 64 ساڵ، یەکیگە لە شانۆنامەنویسە دیارەیل وڵاتەگەی، نزیکەی 40 شانۆنامە نویسایە و
روومان و کوڵە چیرووک و کتاو مناڵەیل و شعر و وتاریش نویسایە.
ماتس مالم، سکرتێر هەمیشەیی ئەکادیمیاگە، لە ستۆکهۆڵم، خەڵاتەگە راگەیان.
مالم وتیش: تەلەفۆن ئەرا فۆس کردیە تا مزگانی خەڵاتەگە وەپی بەێد، و نویسەرەگە لە ئاواییگ ماشین رانیە، و وەپی وتیە هووشد وەخوەدەو بوو مەوقەی رانین تا ئەوەنە رەسیدە ماڵ.
ئەندەرس ئۆلسۆن، سەرۆک دەسەی ئەدەبیات نۆبڵ، وتیە: کارەیل ڤۆس "لە زوان و سروشت پاشخان نەرویجی ریشە کوتایە".
خەڵات نۆبڵ نرخی رەسێدە 11 ملیۆن کرۆن سویدی کە کەێدە یەک ملیۆن دۆلار لە تەمەییگ کە لەلایەن دروسکەری داهێنەر سویدی ئەلفڕێد نۆبڵ هاتیە.
