گەپترین کەشتی گەشتیاری لە جەهان ئامادەس ئەرا گەشتکردن

  شەفەق نیوز/ دۊای ئەوەگ ماوەی دروسکردن سێ ساڵ وەپی چگ، گەپترین کەشتی گەشتیاریی جەهان وەناو “WONDER OF THE SEAS” ئامادەس ئەرا پیشوازیکردن لە گەشتیارەیل. 

کەشتییەگە  لە مانگ کانوون دۊیەم ئمساڵ دریایە وە کۆمپانیای ڕۆیاڵ کاریبیان، بەرزییەگەی 362 مەترە، بڕیارە یەکەم گەشت خوەی  لە 4 ئازار لە ویلایەت فلۆریدا دەسوەپی بکەێد.  بڕیاربۊ لە ساڵ 2021 کەشتییەگە دەسبکەێد وە گەشتەگەی باوجی لەوەر پەتای کۆرۆنا دۊاخریا. 

ئەو کەشتی گەشتیارییە لە 18 نهۆم پێکهاتیە، لە گەشتەگەی بیجگە لە دوو هەزار و 300 کارمەن ناو کەشتییەگە، شەش هەزار و 988 گەشتیاریش هەڵگرێد. 

نرخ بلیتەیل گەشتکردن وە ئەو کەشتییە هالە ناوەن 760 ئەرا 1200 دۆلار،  وەگورەی  ماوە و شۊن گەشتەگە. 

لە مەرجەیل وەرگردن گەشتیار هاتیە، بایەد سەرجەم ئەو گەشتیارەیلە تەمەنیان هالەبان 12 ساڵ ڤاکسین کۆرۆنا وەرگردنە، و مناڵەیل بان  دو ساڵ بایەد وشکنینەیلیان نێگەتیڤ بوود وەرجە گەشتەگە.