تەنیا ئەرا پیاوەیل.. سوود خاسیگ لە قاوە
شەفەق نیوز/ قاوە ئەرا فرە کەس جوور بەشیگ سەرەکیە رۆتین ڕووژاتە، چ لە شەوەکیان بوود یا لە ماوەی دویای نیمەڕو
وەلی شایەت کووپ رووژانەی قاوە کاریگەری خاسیگ پێشبینی نەکریاگ داشتوود، وەگورەی ئەو تۆێژینەوەی نووە ک دەربارەی قاوە ئاشکرای کردگە.
ئەو تۆێژینەوە ک لە ماڵپەڕ «ریسیرچ گایت» بڵاو کریاگە، دەرخست ک قاوە نووشین توانای کەمەوکردن ئەگەر لەدەسدان ژنەفتن لەلای پیاوەگان دیرێد.
تۆێژینەوەکارەگان دین ئەو پیاوەیلە ک رووژانە یەک کووپ قاوە لەلای کەمەو نووشن، وە رێژەی ١٥ لەسەد کەمتر کەفنە وەر کەڕ بوین.
لە وەکارهاوردن بەیاننامەیل ٣٧٠٠٠ کەس لە پیاو و ژن، تۆێژینەوەگە دەرخست ک شایەت قاوە ئەرا ژنەفتن سوودار بوود، لەوەر تایبەتیە دژوە فێکشن و ئۆکسیدی پەیاکردنەگان ک هانە ناوی، وەگورەی قسەیل رۆژنامەی میتڕوی بەریتانی.
لەبان ئەوەیش، دیارە ئی سوود چەوەڕی نەکریاگە لە گشت چینەیل قاوە دەرکەفێد، چ کافاییت لەناوی بوود یا نەوود، و ئەگەریش پاڵایاگە یا نەپاڵیاگە.
وەگەرد ئەوەیش، هیچ پەیوەندییگ لەناوبەین قاوە ژنەفتن لەلای ژنەگان پەیا نەوی.
ئەنجامەگان دەرخستن ک ئەو پیاوەیلە ک رووژانە لەناونی یەک کووپ تا ٤ کووپ ونیم لە قاوە نووشن، کەمتر کەفنە وەر تووشهاتن وە کەڕی.
بەڵکم مارکۆس ماچادۆ ئەندام تیم تۆێژینەوەگە، جەخت کرد ک نەبایەد کەسەگان بڕەیل فرەیگ لە قاوە بنووشن، ئەرا نواگردن کەڕی، چوونکە شایەت بوودە هووکار گرفتەیلیگ تەندروسی لە چینەیلیگ تر.
