کار نوویگ ئەرا تیک تۆک زیای کریا
2022-03-02T09:30:55+00:00
شەفەق نیوز/ تیک تۆک ئەو پلاتفۆڕمەس وە کورتە ڤیدیۆیەیلی وەناوبانگە راگەیان؛ لەیەودۊا بەشداربۊیەیل پلاتفۆڕمەگە تۊنن ماوەی ڤیدیۆلیان تا 10 خولەک درۊژ بکەن.
وەگورەی هەواڵیگ لە وێبسایت "NBC"، قسەکەر پلاتفۆڕم تیک تۆک جیگیرکردن تایبەتمەندی نووەگە پشتڕاس کرد و وت "ڤیدیۆی 10 خولەک نووترین تەقەلایەیلە ئەرا خاسرکردن ئاپ تیک تۆک."
وتیش "ئیمە فرە پەرۆشین وە فروانکردن توانای بڵاوکردن ڤیدیۆیلە ک وەکارهاوەرەیل تۊنن ماوەی ڤیدیۆیەیلە تا 10 خولەک درۊژبکەن، هیواخوازین ئی کارە ریخوەشکەر بوود لە داهێنان زیاتر لە ناوەڕۆک ڤیدیۆیلە.".
بڕیار فروانکردن ماوەی ڤیدیۆیلە ناو تیک تۆک دۊەم جارە جیوەجی کریەێد، یەکەمجار لە ڤیدیۆی یەک خولەکی درۊژکریا ئەرا ڤیدیۆی سێ خولەک، ئیجارەیش لە ڤیدیۆی سێ خولەکی درۊژەوکریا ئەرا ڤیدیۆی 10 خولەکی.
