وینە.. ئەڵمانیا بڕیگ کووچبەر عراقی لە وڵاتەگە دەرکەێد
شەفەق نيوز - پەرلين
دەزگای "القمة" ئەرا کاروبار پەنابەرەیل هەرێم کوردستان و عراق، ئمڕوو چوارشەممە، بڕیگ وینەی کووچبەرەیلیگ عراقی بڵاو کرد، مەوقەی بردنیان ئەرا ناو فڕۆکەیگ مەدەنی تا لە ئەڵمانیا ئەرا بەغداد کلیان بکەن.
وەگورەی دەزگاگە، فرۆکەیگ وە کووچبەرەیلیگ عراقی، دویەکە سێشەممە، لە فڕوکەخانەیگ دەرچگ و روی وەرەو بەغداد کرد، وتیش: ئەو کارە وە سەرپەرشتی پولیس ئەڵمانیا وەڕیەو چگ.
هەرلیوا، شمارەی ئەو کووچبەریلە ئاشکرا نەوی کە وە پاسیگ پولیس بویچگ و دوو پاس گەورەی فڕۆکەخانە خریانە ناو فڕۆکەگە، و ئەفسەرەیل پولیس یەکیەکیان وە پاپچینەی فڕۆکەگە بردنە بان.
دیار نییە ئەگەر لەناو ئەو کەسەیلە هاوڵاتەیلیگ خەڵک هەرێم کوردستان لەناویان بوینە یا نە.
دویەکە سێشەممە، دەسەڵاتەیل ئەڵمانیا بارکردن ئەو پەنابەرەیلە راگەیانن کە پابەند کریانە وە دەرچگن لە وڵاتەگە، کە فڕۆکەیگ لە فرۆکەخانەی لايبزيگ خوەرھەڵات وڵاتەگە هەڵسیا وەرەو بەغداد پایتەخت عراق، و شمارەیگ لە کووچبەرەیل عراقی لەناوی بوین.
وەزارەت ناوخۆی ئەڵمانیا تا ئیسە ئاشکرای شمارەی ئەو عراقیەیلە نەکردگە کە وەو کاروانە لە وڵاتەگە دەرکریان.
ئی کارە دویای چەن رووژیگ تیەێد لە دەرکردن 81 ئەفغانی لە ئەڵمانیا وەرەو کابوڵ، کە دەسەڵات وت: تاوانکار رخبارن و فرەیس رخدارن.
