وە سەرپەرشتی ئەمریکا و فەرەنسا.. عەبدی و شەرع وەیەکەو نیشن
شەفەق نيوز- دیمەشق / هەولێر
شاندیگ لە هەسەدە و ئیدارەی سەروەخوەیی رەسیە کۆشک گەل لە دیمەشق، وەرجە نیمەڕو ئمڕوو چوارشەمە، ئەرا دیدار ئەحمەد شەرع سەرۆک سوریا وە سەرپەرشتیاریی واشینتۆن و پاریس.
پەیامنێر ئاژانس شەفەق نیوز لە سوریا وت: مەزڵوم عەبدی فەرماندەی هەسەدە و ئیلهام ئەحمەد خانمە هاوسەرۆک فەرمانگەی پەیوەندییەیل دەرەکی، و و فۆزە یوسف و عەبد حامد مهباش هاوسەرۆکایەتی شاند نوێنەرەیل باکوور و خوەرهەڵات سوریا، ئەوەسا وەگەرد شەرع و تیمەگەی نیشنە یەکەو وە ئامادەبوین تۆماس باراک کلکریای ئەمریکا و جان باتيست فيڤەر خانمە نوینەر حکومەت فەرەنسا.
پەیامنێر ئاژانس شەفەق نیوز لە زوان سەرچەوەیگ سیاسی کورد وت: ئەوەسا عەبدی و شەرع باس جیوەجیکردن خاڵەیل رێکەفتن ئازار ناوەین دوو لایەن کەن، و پەڵپەیل کورد وە سیستەم نامەرکەزیەت لە سوریا، وەگەرد هاوکاری و هەماهەنگی وەرد هاوپەیمان ناودەوڵەتی لە چوارچیوەی جەنگ داعش لە سوریا.
پەیامنێر ئاژانسمان دیاری کرد کە ئەمریکا و فەرەنسا ئەوەسا پشتگیری لە جیوەجیکردن خاڵەیل رێکەفتن ناوەین عەبدی و شەرع کەن، ئەرا مسۆگەرکردن شیوەی چگن کارەگە وە ئاسانی، وتیش؛ هاتێ راسەوکردن لەناو ئەو رێککەفتنە بوود.
ئەحمەد شەرع سەرۆک وەختانە و مەزڵوم عەبدی فەرماندەی هیزەیل هەسەدە رووژ 10ی ئازار گوزەشتە، رێککەفتنیگ واژوو کردن وە تیکەڵکردن گشت دامەزراوەیل مەدەنی و سەربازی لە ئیدارەی سەروەخوەیی لە چوارچیوەی دەوڵەت سوریا.
ئەو رێککەفتنە باس کار و تەقەلایەیل دەسەیل جیوەجیکار لەبان جیوەجیکردن رێککەفتنەگە کەێد وە مەرجیگ لە کۆتایی ئمساڵ رەد نەکەێد.
