لەناویان عراق.. ئیران پیرۆزبایی جەژن "نەورووز" لە چەن وڵاتیگ کەێد
شەفەق نیوز/ وەزارەت دەرەوەی ئیران، ئمڕوو پەنجشەممە، پیرۆزبایی لە شمارەیگ وڵات کەێد کە ئاهەنگ جەژن "نەورووز" کەن لەناویانیش عراق.
دەزگا راگەیاننن فەرمیەیل ئیران راگەیان، وەزیر دەرەوەی وڵاتەگە عەباس غعراقچی، نامەی پیرۆزبایی جیا ئەرا وڵاتە هاوتایەیل کلکرد کە نەوروز کردنە، ئەوانیش کۆمار تاجیکستان، کۆمار ئازەربایجان، ، ئۆزبەکستان، ئەفغانستان، پاکستان، تورکەمەنستان، تورکیا، عراق، و قیرغستان، کازاخستان، و هندستان، وەبوونەی جەژن نەورووز پیرۆزباییلەلیان کرد و هیوای ساڵیگ پڕ ئاشتی و خوەشبەختی ئەرا ئەو وڵاتەیلە خوازی.
وەزیر دەرەوە لە نامەگەی کە ئەرا هاوتایەیلی جەژن نەورووز وەسف کرد وە "وە یەکیگ لە نیشانەیل دیارپەیوەنی قویلیگ مێژوویی و رووشنهویری و شارستانی ناوەین وڵاتەیل ناوچەی نەورووز دانرێد، ئێ نەریت دێرینە لە ئیلهام وەرگردن لە هاوسەنگی وەهار و نووەوبوین سروشت و دوارە لەداڵگبوین زەوی، بەهایەیل ئاشتی و دادپەروەری و پێکەوەژیان ناوەین مرۆڤایەتی بەرجەستە کەێد.
عراقچی راگەیان، نەورووز، میراتیگ رووشنهویری هاوبەشە لەناوەین میلەتەیل کە وەدرویژایی مێژوو ئاهەنگی کردنە، هاتێ بوودە بناغەی ئەوزەڵداین وە لەیەکفامستنەیل و دۆستایەتی و هاوکاری ناوەین گەلەیل.
