زەخمداربوین سەرۆک ئیران لە تەقەلای کوشتنی وەدەس ئیسرائیل
شەفەق نيوز - وەشوینکەفتن
مەسعود پزیشکیان سەرۆک ئیران، لە پەلاماریگ ئیسرائیلی وەبان ئەنجومەن نەتەوەیی باڵا لە مانگ گوزەشتە زەخمداری بویە، وەگورەی ئاژانس خەوەری ئیرانی نیمچە فەرمی "فارس".
ئاژانسەگە لە خەوەریگ وت: پزیشکیان تویش زەخمەیل سووکیگ لە پای هاتگە، ئەوەیش لە پەلامار ئیسرائیل وەبان گردەوبوین ئەنجومەن باڵای ئاسایش نەتەوەیی لە ڕووژ 16ی حوزەیران.
وتیش: ئەو پەلامارە وەبان گردەوبوین ئەنجومەن باڵای ئاسایش نەتەوەیی ئیران، سەرۆکەیل سێ دەسەڵات و گەورە وەرپرسەیل وڵات لەناوی بوین.
وتیش: وەرپرسەیل ئیران توەنستن لەناو ئەو بینا دەرچن، هەرچەن لە قاتەیل خوارگ بوینە، وە وەچیگەو دەرچگن ئەرا فریاکەفتن دروس کریاوێد، دویای زەخمداری بەشیگیان.
ئاژانسەگە دیاری کرد کە چوینکە ئەو زانیاریەیلە کە کەفتنەسە دەس ئیسرائیل لەبان ئەو گردەوبوینە فرە ناسک بوینە، ئەراوە دەسەڵاتەیل ئیران لێکولینەوە کەن لە گومان دزەکەریگ.
وتیش: ئی پەلامارە دروس کریاس تا هەکاتی کوشتن حەسەن نەسرولڵا سکرتێر گشتی حزبولڵا بوود.
لەو پەلامارە 6 بومب یا مووشەک وەشیا، وەرەو دەروازەیل و ریەیل دەرچگن ئەو بینا کە گردەوبوین لەناوی بوی، تا ریەیل دەرچگن بوەسێد، و وەناوچگن وا بووڕێد.
دویای ئەو تەقینەوەیلە، کارەبا بڕیا، وەلێ وەرپرسەیل وە کەل فریاکەفتنەو توەنستن بچنە دەیشت.
پزیشکیان توومەت ئیسرائیل کرد وە تەقەلای کوشتنی وەبی دیاریکردن وەختەگەی، ئەوەیش لە چەوپیکەفتنیگ وەرد میدیاکار ئەمریکی تاکەر کارلسون لە هەفتەی گوزەشتە.
پزیشكيان لەو وەختە وت: تەقەلا دان، بەڵی، وەیجویرە کردن، وەلێ شکست هاوردن.
وتیش: ئەگەر ئەمریکا لەپشت تەقەلای کوشتنم نەوسیاس، دی ئیسرائیلە، لەناو گردەوبوینیگ بویم، و تەقەلای پەلاماردان ئەو شوینە دان کە لەناوی گردەو بویمن.
وتیش: م رخم نیەچوود ئەرا وڵاتم و مقیەتیکردن سەروەریی خوەم وە قوربانی بیەم، من ئامادەم گیانم بکەمە قوربانی وڵاتم، وەلێ ئایا ئەوە ئاسایش ئەرا ناوچەگە تیەرێد؟.
