خوەنەوارەیلیگ لەناو مەکتەویگ لە ئوردن هاوڕییگیان سزنن
شەفەق نیوز/ دوو خوەنەوار مەکتەو لە ئوردن، گاز رشاننە مل هاوڕییگیان وەناو محمد حەمیدی تەمەن ١١ساڵان، و ئاگری دانە، کە تویش سزیان سەختیگ هات، و هیمان لە خەسەخانە خەفتیە.
ئی رویداو دڵتەزنە لەناو مەکتەویگ لە لیوای رسیفە سەروە پارێزگای زەرقا ناوڕاس ئوردن بویە، کە رووشنایی خەێدە بان ئەو تونوتیژیە کە لەناو بەشیگ لە مەکتەوەیل و ناوەین خوەنەوارەیل بوود.
لە ساعەتەیل گوزەشتە، بریگ لە ئوردنیەیل ڤیۆرزی محمد بڵاو کردن کە لەناوی باس ئەوە کەێد کە وەسەری هات، کە دیاری کەێد خوەی لەناو پۆلەگە بویە، و مامووستا لەلی داوا کردگە جاڕوو بارێد تا ئەو ناوە پاکەو بکەن، یەیش چگەسە ئاشخانە، و دووان لە هاوڕیەیلی لەورا بوینە، گردنەسەی، و گاز وەبان لەشی رشاننە، ئیجا ئاگری دانە.
وتیش: م هویچیگ وەپییان نەکردمە، ئەڕا ئیجویرە وەردەم کردن؟، م یەتیمم، و ئەزیەت کەسیگیش نەیامە.
مامووستایەیل وەگەرد ژنەفتن قیژە رەسینە شوینەگە، وتوەنستن ئاگرگە لە لەش بویچگی کپەو بکەن، و ئەرا خەسەخانە کلی بکەن.
لەلای خوەییش، داڵگ کوڕەگە، داوا لە میدیایل راگەیانن کرد دادپەروەری وە کوڕەی بڕەسنن، کە وت: کوڕەم لە ماڵ دەرچگە ئەرا مەکتەو، و نەزانستم وە سزیای ئەرام گلەو خوەێد، چوین ئی کارە لەناو مەکتەو بوود؟، لە وەختیگ ئەنوو دەنگ ئی داڵگە تاسان وتیش: ئەو کەسەیلە دەسەیل رووڵەی بەسانە و دەرەگە لەبانی قایم کردنە.
هەمیش داوا لە گشتی کرد ماف کوڕەی بوریەێد، کە ستەم گەورەیگ وەپی رەسیە، و لە کۆتایی وتیش: نیەخوازم داڵگیگ ترەک ئی جویرە وەسەری باێد.
لە وەختیگ ئاسایش گشتی دووپات کرد کە وەڕیەوبەرایەتی مقیەتیکردن خیزان لێکۆڵینەوە لە رویداوەگە کەێد، وتیش: ئەو دوو ناخاڵە گردنە، و قسەی وەچەودیەیل ژنەفن، و نووڕنە کامیرایل، تا پرسەگە ئەرا لایەنەیل دادوەری بچوود.
