باسیگ فەرەنسی لە گلەوداین "پەیکەر ئازادی": ئەمریکییەل ستەمکارەیل پەسەن کردن

شەفەق نیوز/ رافائیل جلاکسمان، نوینەر فەرەنسی لە پارت "بلاس بوبليك" (مامناوەن چەپ)، ئمڕوو دووشەممەڕ داوا لە ئەمریکا کرد پەیکەر ئازادی گلەو بەێد، کە وت؛ سیاسەت ئیشەی ئەمریکا وەگەرد ئەرزشەیل ئەو پەیکەرە نەگونجیاس. 

ئەوەیش لە کونگرەی حزبەگە هات، کە جلاكسمان وە زبری رەخنە لە هەڵوێست ئەمریکا گرد وەرانوەر ئوکراینا و رووسیا.

پەیکەر ئازادی، کە فەرەنسا لە ساڵ 1884  پیشکەشی کردە ئەمریکا، هیمای هاوپەیمانیە ناوەین دوو وڵات، کە کەفێدە نیویۆرک، جویر هیمای جەهانیە ئەرا ئازادی و دیموکراتی.

جلاکسمان وتیش؛ پەیکەر ئازادی ئەرامان گلەو بیەن، ئەوەسا وەو ئەمریکیەیلە ئویشیمن کە لەشان ستەمکار وسیان، و وەو ئەمریکیەیلە کە مینەکەرەیل داوایان وە ئازادی زانستی قاو دانە، ئویشیمن: پەیکەر ئازادی ئەرامان گلەو بیەن.

 وتیش: ئەو پەیکەرە پیشکەش وە ئیوە کردیمن، وەلێ دیارە ئیوە سووکایەتی وەپی کەین، ئەراوە لەیرا بوود خاسترە.

ئی پەڵپە لە چوارچیوەی رەخنەیل فراوانیگ تیەێد ئەرا سیاسەتەیل دۆناڵد ترەمپ سەرۆک ئەمریکا وەرانوەر ئۆکرانیا و رووسیا، کە فرە لە ئەوروپیەیل بوخت لاینگریی ئەرا ڤلادیمێر پۆتین سەرۆک رووسیا وەپی کردن.