پەیاکردن ئەڵاجەوییگ لە ئاسمان بان زەوی کە ها پشت کارەساتەیل سروشتی
شەفەق نیوز/ توێژەرەیل پەیمانگای تەکنەلۆجیای فیدراڵی لۆزان، ئەرایان دەرکەفت کە گەردیلە بایۆلۆژییە بویچمەیل، جویر رەگ و بەکتریا و جیماگەیل درەخت، کاریگ سەرەکی رانن لە دروسبوین یەخ لەناو هەورەیل، یەیش کاریگەری لەبان وارانوارین و رویداوە تونەیل کەشوهەوا دیرێد.
توێژینەوەگە لە گۆڤار زانستی کەشوهەوا و کەشوهەوا بڵاو کریاس، ئاشکرا کردگە کە ئەو تەنۆلەیلە کە وە "گەردیلە زنیەیل" ناسیانە، نەک تەنیا دەس لەناو وا دیرن، بەڵکم ئەرکیگ گرنگ کەشوهەوا ئەنجام دەن لەڕی گاڵداین بەسین تکەیل ئاو لەناو هەورەیل، یەیش گام یەکەمە لە دروسبوین وەفر و وارانوارین رفت.
پرۆفیسۆر ئاتاناسیۆس نێنیس کە سەرپەرشتی توێژینەوەگە کەێد وت: "یەخەگە زویتر لە تکە ئاوەیل داوەزێد، دروسبوین خەسیگ لە هەورەیل بوودە مدوو واران فرەیگ کە توەنێد گەشە بکەێد و بوودە زریانی وەفر یا واران".
ئەوەگ رخدارترە، وەقسەی نینیس، ئەوەسە کە گەرمبوین جیهان بویین ئی تەنۆلکەیلە لە بەرگەهەوا زیای کەێد، یەیش توەنێد هەڵاوسان کەشوهەوا و تونی رویداوەیل کەشوهەوا زیای بکەێد.
توێژینەوە مەیدانییەگە لە کویەی هێلمۆس لە باشوور یۆنان ئەنجامدریاس، کە زانایەیل وە درویژایی رووژ چەودیاری جویلەی ئەو تەنۆلکانەیلە کردنە، ەەکەرد هەڵاتن خوەر، تەنۆلکە بایۆلۆژییەیل لە دارستانەیلەو بەرزەو بوون وەرەو بەرگەهەوا، تا نیمەڕوو رەسنە لویتکە، ئەو وەختەس کە فرەترین توانای گاڵدان بەسین هەورەیل دیرن.
توێژەر کونفێنگ گاو دووپات کەێد کە تیمەگە "پەیوەندییج ئاشکرا و کوتپڕ لە ناوەین زیایبوین خەسی تەنۆلکە بایۆجینیکەیل و زیایبوین ئەگەر دروسبوین یەخ لە هەورەیل" وەدیکردنە، یەیش بویەسە ئاڵشتکارییگ لە شیوەی واران.
مەزەنە کریەێد ئەنجام ئی توێژینەوە بەشداربوود لە خاسترکردن هویردی شیوەیل مەزەنەکردن کەشوهەوا، یەیش بیجگە لە خاسترکردن کار مانگە دەسکردەیل جویر EarthCare ئاژانس بۆشایی ئاسمانی ئەوروپا لە چەودیاریکردن ئاڵشتکاریی کەشوهەوا لە جیهان.
