يونامي: ئەو پەلامارەیلە لەبان سەروەری عراق بایەسە بوسیەنەو
2023-09-19T06:37:46+00:00
شەفەق نیوز/ شاند نەتەوە یەکگرتگەیل ئەرا دەسمیەتیداین عراق (يونامي)، ئمڕوو سێشەممە، هەڵویستیگ لە پەلامارەیل بان فڕۆکەخانەی عەربەت لە پارێزگای سلێمانی نشان دا، و دووپات لە گرنگی چارەسەرکردن گیچەڵەیل ئەمنی وە دانوسەنین و دیبلۆماسی کرد.
یونامی لە پۆستیگ نویسان: نەفرەت ئەو پەلامارە کەێد لەبان فڕۆکەخانەی عەربەت لە پارێزگای سلێمانی، کە بویە مدوو کەفتن شمارەیگ قوربانی.
وتیش: بایەسە ئەو پەلامارەیلە بوسیەنەو کە شکست وە سەروەری عراق دەن وە شیوەیگ دووارەکریای.
شاند نەتەوە یەکگرتگەیل دووپات کرد کە بایەسە گیچەڵەیل ئەمنی وە دانوسەنین و دیبلۆماسی چارەسەر بکریەن، نەگ وە پەلامار.
وەرجەیە، لیوا یەحیا رەسول قسەکەر فەرمی فەرماندەی گشتی هیزە چەکدارەیل، راگەیان کە فڕۆکەیگ بیفڕۆکەوان هاتە ناو ئاسمان عراق لە سنوور تورکیاوە، و پەلامار فڕۆکەخانەی عەربەت دا لە پارێزگای سلێمانی لە هەرێم کوردستان، کە بویە هوکار کوشیان سێ لە دەزگای دژەتیرۆر و زەخمداری سێیان ترەک.
